రాఘవ లారెన్స్.. ఈ పేరు చెబితే చాలు మాస్‌కి మాంచి ఊపు వస్తుంది. డ్యాన్స్ ఎంత బాగా చేస్తాడో... యాక్టింగ్ కూడా అంతే బాగా చేస్తాడు. కొరియోగ్రాఫర్‌గా, హీరోగా, డైరెక్టర్‌గా, ప్రొడ్యూసర్‌గా ఇలా తను ప్రవేశించిన ప్రతి శాఖలో సక్సస్ సాధించి సెన్సేషన్ క్రియేట్ చేసాడు. టాలీవుడ్ కింగ్ నాగార్జున.. లారెన్స్‌కి దర్శకుడిగా అవకాశం ఇచ్చారు.
తొలి ప్రయత్నంతోనే ఘన విజయం సాధించి అందరి దృష్టిని ఆకర్షించాడు. ఆ తర్వాత తెలుగులో స్టైల్, డాన్, రెబల్.. ఇలా విభిన్న కథా చిత్రాలను తెరకెక్కించి మాస్‌ని మెప్పించాడు. ఆ తర్వాత నుంచి ముని, కాంచన, కాంచన 2, కాంచన 3... ఇలా... వరుసగా హర్రర్ మూవీస్ తెరకెక్కిస్తూ... బాక్సాఫీస్ వద్ద బ్లాక్ బస్టర్స్ సాధిస్తూ వరుసగా విజయాలు సాధిస్తున్నాడు.
అయితే... వరుసగా హర్రర్ మూవీస్ చేస్తుండటంతో లారెన్స్ హర్రర్ తప్పా... కమర్షియల్ మూవీస్ తెరకెక్కించలేడు అనే విమర్శలను ఎదుర్కొంటున్నాడు కోలీవుడ్లో. అందుకనే... ఆ విమర్శలకు సమాధానం చెప్పడం కోసమే... స్టార్ హీరో విజయ్‌తో సినిమా ప్లాన్ చేసాడని తెలిసింది. విజయ్ ప్రస్తుతం లోకేశ్ కనగరాజ్ దర్శకత్వంలో మాస్టర్ అనే సినిమా చేస్తున్నాడు. ఈ సినిమా తర్వాత మురుగదాస్ దర్శకత్వంలో ఓ సినిమా చేయనున్నాడు.
ఈ రెండు సినిమాలు పూర్తయిన తరువాత లారెన్స్‌తో విజయ్ సినిమా చేయనున్నాడు. ప్రస్తుతం లారెన్స్ విజయ్‌కి కరెక్ట్‌గా సరిపోయే కథ రెడీ చేస్తున్నాడని సమాచారం. విజయ్‌కి మాస్‌లో ఎంత ఫాలోయింగ్ ఉందో తెలిసిందే. ఇక లారెన్స్‌కి కూడా మాస్‌లో మంచి క్రేజ్ ఉంది. ఇక ఇద్దరూ కలిస్తే.. ఆ సినిమా ఎలా ఉంటుందో ఊహించుకోవచ్చు. త్వరలోనే అఫిషియల్‌గా ఎనౌన్స్ చేస్తారేమో చూడాలి.
