సూపర్ స్టార్ రజినీకాంత్ నటించిన 'జైలర్' చిత్రం తెలుగు రాష్ట్రాల్లో తన సత్తా చాటుతోంది. ఈ నెల 10వ తేదీన విడుదలైన ఈ చిత్రం గత నాలుగు రోజుల్లో ఏపీ, తెలంగాణాల్లో ఏకంగా రూ.32 కోట్ల గ్రాస్ వసూళ్లను రాబట్టినట్టు చిత్రాన్ని తెలుగులో రిలీజ్ చేసిన పంపిణీదారులు ఏషియన్ సునీల్, నిర్మాత దిల్ రాజులు వెల్లడించారు. అదేసమయంలో ఈ చిత్రంతో పాటు వచ్చిన మెగాస్టార్ చిరంజీవి చిత్రం "భోళాశంకర్" మాత్రం బాక్సాఫీస్ వద్ద పూర్తిగా నిరాశపరిచింది. ఈ చిత్రం ఒక రోజు విరామంతో ఆగస్టు 11వ తేదీన విడుదలైంది.
సన్ పిక్చర్స్ బ్యానరుపై నెల్సన్ దిలీప్ కుమార్ దర్శకత్వంలో ఈ చిత్రం వచ్చింది. తొలి రోజునే భారీ ఓపెనింగ్స్‌ను రాబట్టిన జైలర్... నాలుగు రోజుల్లో 32 కోట్ల రూపాయల గ్రాస్ వసూళ్లను రాబట్టినట్టు వెల్లడించారు. ఈ మధ్య వచ్చిన అనువాద చిత్రాల్లో ఇంత వేగంగా ఈ స్థాయి వసూళ్లను రాబట్టిన చిత్రాలు ఇదే కావడం గమనార్హం.
ఇందులో సూపర్‌స్టార్‌ను దర్శకుడు చూపించిన విధానం, ఆయన స్టైల్‌కి తగినట్టుగా సన్నివేశాలు డిజైన్ చేయడం, యాక్షన్ దృశ్యాల వెంట ప్రేక్షకులను పరిగెత్తిస్తూ వెళ్లి, ఎమోషన్స్‌తో కూడిన ట్విస్ట్ ఇవ్వడం, కుటుంబ క్షేమాన్ని మాత్రమే కాదు.. సమాజ శ్రేయస్సును కూడా చూడాలన్న కోణంలో ఈ చిత్రాన్ని మలిచిన తీరు ప్రేక్షకులను అమితంగా ఆకర్షించింది. ఫలితంగా జైలర్‌కు ప్రేక్షకులు బ్రహ్మరథం పట్టారు.
