వ్యసనం అనేది ఎంతటివారినైనా పాతాళానికి ఎలా తొక్కేస్తుందో ఈ హాలీవుడ్ నటుడిని చూస్తే తెలిసిపోతుంది... అందులోనూ ఆ వ్యసనం డ్రగ్స్‌కి సంబంధించినదైతే ఎంతటి దారుణాలైనా చేయించేస్తుంది. సరిగ్గా ఇదే పరిస్థితి హాలీవుడ్ నటుడు, సింగర్ జోసెఫ్ గేడోస్‌ను చిక్కుల్లోకి నెట్టేసింది.
2003వ సంవత్సరంలో భారీ హిట్ సాధించిన హాలీవుడ్ మ్యూజికల్ చిత్రం ‘స్కూల్ ఆఫ్ రాక్’లో కీలకపాత్ర పోషించిన జోసెఫ్.. కొంతకాలం తర్వాత సొంత బ్యాండ్ ఏర్పాటు చేసుకున్నాడు. అయితే దానిపై సరిగా దృష్టిపెట్టలేకపోయాడు. అదే సమయంలో అతనికి డ్రగ్స్ అలవాటయ్యాయి. ఆ దురలవాటుకి బానిసైపోయి సొంత ఇంట్లోనే దొంగతనాలు చేయడం మొదలుపెట్టాడు.
ఆ తర్వాత దగ్గరలోని మ్యూజిక్ స్టోర్లలో గిటార్ల వంటివి దొంగలించడం మొదలెట్టాడు. ఇలా చాలా చోట్ల దొంగతనాలు చేసిన జోసెఫ్‌ను సీసీ ఫుటీజీ ఆధారంగా గుర్తించిన పోలీసులు అతనిపై దొంగతనం కేసు నమోదు చేసి అరెస్టు చేసారు.
డ్రగ్స్ అలవాటు వల్లే తాను దొంగగా మారానని, తనకు ట్రీట్‌మెంట్ తీసుకోవాలని ఉందని అతను కోరినట్లు సమాచారం. స్కూల్ ఆఫ్ రాక్‌లో ప్రముఖ నటుడు బ్లాక్‌జాక్‌తో స్క్రీన్‌ని పంచుకున్న జోసెఫ్ ఇలా అయిపోయినందుకు అతని తండ్రి, స్థానికులు విచారం వ్యక్తం చేస్తున్నారు.
