జబర్దస్త్ కామెడీ షోతో ఎంతోమంది కమెడియన్స్ తెలుగు తెరకు వచ్చారు.. వెళ్లిపోయారు కానీ కొందరు మాత్రమే అక్కడే సెటిల్ అయిపోయారు. అందులో ముఖ్యంగా చెప్పుకోవాల్సిన నటుడు సుడిగాలి సుధీర్. ఏడేళ్లుగా తెలుగు ప్రేక్షకులను తన కామెడీ టైమింగ్‌తో నవ్విస్తూనే ఉన్నాడు. మే 19న ఈయన పుట్టిన రోజు. 1987లో పుట్టాడు సుధీర్.
బుల్లితెరపై ప్రస్తుతం ఉన్న కమెడియన్స్‌లో నెంబర్ వన్ సుధీర్ అంటే అతిశయోక్తి కాదు. టీవీ షోలతో పాటు యాంకర్, డాన్సర్, మెజీషియన్‌గా కూడా సత్తా చూపిస్తున్నాడు సుధీర్. ఈ మధ్యే సాఫ్ట్‌‌వేర్ సుధీర్ అంటూ హీరో అయ్యాడు కూడా. మిగిలిన సినిమాల్లో కూడా చిన్నచిన్న పాత్రలు చేసాడు.
ఆ తర్వాత 3 మంకీస్‌తో పాటు మరిన్ని సినిమాలు చేస్తున్నాడు సుధీర్. ఇప్పుడు ఈయన డేట్స్ హాట్ కేక్.. 30 రోజులు ఫుల్ బిజీగానే ఉన్నాడు. జబర్దస్త్ కామెడీ షోతో పాటు ఇంకా చాలా షోస్ చేస్తున్నాడు సుధీర్.
అనామకుడిగా ఇండస్ట్రీకి వచ్చి ఇప్పుడు తనకంటూ బుల్లితెరపై స్పెషల్ క్రేజ్ సంపాదించుకున్నాడు సుడిగాలి సుధీర్. మ్యాజిక్ చేస్తూ సినిమా వాళ్లకు చేరువైన ఈయన.. గెటప్ శ్రీను పుణ్యమా అని జబర్దస్త్ ఎంట్రీ ఇచ్చాడు. రూమ్ మేట్స్ అయిన సుధీర్, శ్రీను.. ఆ తర్వాత టీమ్ మేట్స్ అయ్యారు.
శ్రీనునే జబర్దస్త్ కమెడియన్ వేణుకు పరిచయం చేయడం.. ఆ తర్వాత జబర్దస్త్‌లో ఎంట్రీ.. స్టార్ డమ్ జరిగాయి. ఏడేళ్లుగా వెనక్కి తిరిగి చూసుకోకుండా సుధీర్ జర్నీ సాగుతుంది. ఇక ఈయన కెరీర్‌లో రష్మి గౌతమ్ ఎప్పుడూ ప్రత్యేకమే. చెప్పుకునేంత రిలేషన్ వీళ్ల మధ్య లేకపోయినా.. గాసిప్స్ రాసుకునేంత రిలేషన్ మాత్రం ఎప్పుడూ ఉంటుంది.
సంపాదన విషయంలో కూడా సుడిగాలి సుధీర్ దూకుడు చూపిస్తున్నాడు. ఈయన ఆస్తి విలువ ఎంతుంది అని తెలుసుకోడానికి అభిమానులు కూడా ఆసక్తిగానే ఉన్నారు. ఈయన ప్రస్తుత ఆస్తి లెక్కలు కడితే దాదాపు 3 కోట్ల నుంచి 5 కోట్ల మధ్యలో ఉంటుందని ప్రచారం అయితే గట్టిగానే జరుగుతుంది.
ఏడాదికి కనీసం 25 నుంచి 35 లక్షలు మధ్యలో సంపాదిస్తున్నాడు సుధీర్. అందులో జబర్దస్త్ షోతో పాటు ఢీ ఛాంపియన్స్, పోవే పోరా లాంటి షోలు, ఇతర ఈవెంట్స్ కూడా ఉన్నాయి. ఏదేమైనా కూడా చిన్న స్థాయి నుంచి వచ్చి ఈ స్థాయికి ఎదగడం కూడా మాటలు కాదు. ఎనీవే సుడిగాలి సుధీర్ కెరీర్‌లో ఎదగాలని ఆశిస్తూ బర్త్ డే విషెస్ చెప్పేద్దాం..
