మాస్ మహారాజా రవితేజ హీరోగా విఐ ఆనంద్ దర్శకత్వంలో ఎస్ ఆర్ టి ఎంటర్టైన్మెంట్స్ బ్యానర్ పై రామ్ తాళ్లూరి నిర్మాణంలో తెరకెక్కుతున్న తాజా సినిమా డిస్కో రాజా. రజిని తాళ్లూరి నిర్మాతగా వ్యహరిస్తున్న ఈ సినిమాకు యువ సంగీత దర్శకుడు థమన్ సంగీతాన్ని అందిస్తున్నారు. ఇటీవల రిలీజ్ అయిన ఈ సినిమా ఫస్ట్ లుక్ పోస్టర్ ప్రేక్షకుల నుండి మంచి స్పందనను రాబట్టడం జరిగింది.
ఇకపోతే ఈ సినిమాలోని ‘నువ్వు నాతో ఏమన్నవో’ అనే పల్లవితో సాగె ఫస్ట్ లిరికల్ సాంగ్‌ని యూట్యూబ్‌లో రిలీజ్ చేసింది సినిమా యూనిట్. తమన్ స్వరపరిచిన మెలోడియస్ ట్యూన్‌కి, గాన చక్రవర్తి ఎస్పీ బాలసుబ్రహ్మణ్యం తన మధురమైన గాత్రంతో ఈ పాటను ఎంతో హృద్యంగా ఆలపించడం జరిగింది.
సిరివెన్నెల సీతారామశాస్త్రి గారి కలం నుండి జాలువారిన అందమైన సాహిత్యం, ఈ పాటకు మరింత ఆకర్షణగా నిలిచిందనే చెప్పాలి. ప్రస్తుతం ఈ సాంగ్ శ్రోతలను విశేషంగా ఆకట్టుకుంటూ మంచి వ్యూస్‌తో దూసుకుపతోంది. రవితేజ సరసన పాయల్ రాజ్ పుత్, నభ నటేష్ హీరోయిన్స్‌గా నటిస్తున్న ఈ సినిమాను అన్ని కార్యక్రమాలు పూర్తిచేసి డిసెంబర్ 20న వరల్డ్‌వైడ్‌గా రిలీజ్ చేయనున్నారు.
