నందమూరి నట సింహం బాలకృష్ణ ప్రస్తుతం ఊర మాస్ డైరెక్టర్ బోయపాటి శ్రీనుతో సినిమా చేస్తున్న విషయం తెలిసిందే. ఈ భారీ యాక్షన్ ఎంటర్టైనర్‌ని యువ నిర్మాత మిర్యాల రవీందర్ రెడ్డి నిర్మిస్తున్నారు. ఇటీవల బాలయ్య పుట్టినరోజు సందర్భంగా రిలీజ్ చేసిన ఈ మూవీ టీజర్ కి ట్రెమండ్ రెస్పాన్స్ వచ్చింది. దీంతో ఈ సినిమా ఎప్పుడు రిలీజ్ అవుతుందా అని ఆసక్తితో ఎదురు చూస్తుంటే.. కరోనా కారణంగా ఎప్పుడు రిలీజ్ అవుతుందో ఇప్పుడు చెప్పలేని పరిస్థితి.
ఇదిలా ఉంటే... ఈ సినిమా తర్వాత బాలయ్య సీనియర్ డైరెక్టర్ బి.గోపాల్ తో సినిమా చేయనున్నట్టు వార్తలు వచ్చాయి. ఆ తర్వాత ఈ ప్రాజెక్ట్ క్యాన్సిల్ అయినట్టు ప్రచారం జరిగింది. తాజా వార్త ఏంటంటే... బాలయ్య, బి.గోపాల్‌తో సినిమా చేయడానికి ఓకే చెప్పాడట. బోయపాటితో చేస్తున్న సినిమా కంప్లీట్ అయిన తర్వాత బి.గోపాల్‌తో సినిమా స్టార్ట్ చేస్తారట. ఈ చిత్రానికి స్టార్ రైటర్ బుర్రా సాయిమాధవ్ సంభాషణలు అందిస్తున్నారు.
ప్రస్తుతం స్ర్కిప్ట్ వర్క్ జరుగుతుందని తెలిసింది. బాలయ్య - బి.గోపాల్ కాంబినేషన్లో రూపొందిన రౌడీ ఇన్‌స్పెక్టర్, లారీ డ్రైవర్, సమరసింహారెడ్డి, నరసింహానాయుడు చిత్రాలు సెన్సేషన్ క్రియేట్ చేసాయి.
దీంతో వీరిద్దరి కాంబినేషన్లో సినిమా అంటే అంచనాలు ఓ రేంజ్‌లో ఉంటాయి. ఆ అంచనాలకు ఏమాత్రం తగ్గకుండా ఈ సినిమా ఉంటుందంటున్నారు. అయితే.. ఈ సినిమా నిర్మాత ఎవరో..? ఇందులో బాలయ్య సరసన నటించే హీరోయిన్ ఎవరో..? అనేది తెలియాల్సివుంది.
