కరోనా వైరస్ బారినపడిన సినీ నేపథ్యగాయకుడు ఎస్.పి.బాలసుబ్రహ్మణం ఆరోగ్య పరిస్థితిలో ఎలాంటి మార్పులేదు. ఆయన ప్రస్తుతం ఎక్మోసపోర్టుతో ప్రత్యక ఐసీయు వార్డులో ఉంచి చికిత్స అందిస్తున్నారు. ఆయన ఆరోగ్య పరిస్థితిని నిపుణులైన ప్రత్యేక వైద్య బృందం నిరంతరం పర్యవేక్షిస్తోంది.
తాజాగా ఎస్పీబీ ఆరోగ్య పరిస్థితిపై చెన్నై ఎంజీఎం ఆసుపత్రి ఈ సాయంత్రం బులెటిన్ వెలువరించింది. ఎస్పీ బాలు ఇంకా ఎక్మో సపోర్ట్‌తో వెంటిలేటర్‌పైనే ఉన్నారని, ఆయన ఆరోగ్య పరిస్థితిలో ఏ మార్పు లేదని, నిలకడగానే వుందని ఆ బులెటిన్‌లో తెలిపారు.
బాలు ప్రస్తుతం ఐసీయూలో చికిత్స పొందుతున్నారని, విభిన్న వైద్య విభాగాల నిపుణులతో కూడిన తమ వైద్య బృందం అహర్నిశలు బాలు ఆరోగ్య పరిస్థితిని పర్యవేక్షిస్తోందని, ఆయన శరీరంలో కీలక అవయవాల స్పందనను ఎప్పటికప్పుడు పరిశీలిస్తూ తగిన చర్యలు తీసుకుంటోందని బులెటిన్‌లో వివరించారు. బాలు ఆరోగ్య పరిస్థితికి సంబంధించిన వివరాలను ఎప్పటికప్పుడు ఆయన కుటుంబ సభ్యులకు తెలియజేస్తున్నామని పేర్కొన్నారు.
