హీరో అక్కినేని నాగార్జున కుమారుడు, అక్కినేని వారసుడు అఖిల్ అక్కినేని కేరీర్‌లో ఒక్కటైనా మంచి హిట్ లేదు. దీనికి కారణం.. ఆయన కథల ఎంపికలో బోల్తాపడటమేనని సినీ ప్రముఖులు అంటున్నారు. ముఖ్యంగా, లవ్ స్టోరీలు, ఫాంటసీలు, యాక్షన్ డ్రామాలూ ఇలా ఏం చేసినా ఆయనకు ఏమాత్రం కలిసి రావడంలేదు.
భారీ బడ్జెట్‌తో రూపొందించిన "ఏజెంట్" సైతం బాక్సాఫీస్ వద్ద బోల్తా పడింది. ఈ ఫ్లాఫ్‌లతో అఖిల్ మరింత ఆలోచనలో పడ్డాడు. ఈసారి ఏ జోనర్‌లో సినిమా చేయాలి? ఏ దర్శకుడిని ఎంచుకోవాలి? అనే విషయాల్లో తీవ్ర తర్జన భర్జనల్లో ఉన్నాడు. తన దృష్టి ఇప్పుడు ఫ్యామిలీ ఎంటరైనర్‌పై పడిందని టాక్. కుటుంబ కథా చిత్రంలో నటిస్తే.. సేఫ్ జోనర్ అవుతుందని భావిస్తున్నాడట.
ఈ తరహా కథలకు శ్రీకాంత్ అడ్డాల కేరాఫ్ అడ్రస్. శ్రీకాంత్ కూడా ఓ మంచి ప్రాజెక్ట్, కాంబో కోసం ఎదురు చూస్తున్నారు. ప్రస్తుతం ఆయన 'పెద్దకాపు' సినిమాతో బిజీగా ఉన్నారు. ఈ చిత్రాన్ని రెండు భాగాలుగా విడుదల చేస్తున్నారు. ఆ తర్వాత ప్రాజెక్ట్ అఖిల్‌తో ఉండొచ్చని టాక్. యూవీ క్రియేషన్స్ సంస్థ ఈ చిత్రాన్ని నిర్మించబోతోంది. ప్రస్తుతం కథా చర్చలు జరుగుతున్నాయి. త్వరలోనే ఈ కాంబోపై ఓ స్పష్టత వచ్చే అవకాశం ఉంది.
