పవర్ స్టార్ పవన్ కళ్యాణ్‌ అంటే గిట్టని నటీమణుల్లో శ్రీరెడ్డి ఒకరు. మెగా ఫ్యామిలీ కారణంగా ఆమె హైదరాబాద్ వదిలి చెన్నైకు వచ్చి సెటిల్ అయ్యారనే వార్తలు వినిపిస్తున్నాయి. పైగా, ఈమె పవన్‌కు వ్యతిరేకంగా ఎవరు మాట్లాడినా వారికి మద్దతు ఇస్తుంటారు. అలా టాలీవుడ్ వివాదస్పద దర్శకుడు రాంగోపాల్ వర్మకు కూడా తన సంఘీభావాన్ని, మద్దతును తెలిపారు.
ఈ క్రమంలో పవన్‌ను లక్ష్యంగా చేసుకుని వర్మ "పవర్ స్టార్" పేరుతో ఓ చిత్రాన్ని నిర్మిస్తున్నారు. ఇందులో అచ్చం పవన్‌ను పోలిన డూప్ నటీనటులను ఎంపిక చేసుకున్నారు. ఈ చిత్రంలోని ఓ పాటను కూడా వర్మ తాజాగా విడుదల చేశారు.
మరోవైపు, వర్మను టార్గెట్ చేస్తూ పవన్ ఫ్యాన్స్ "పరాన్నాజీవి" పేరుతో ఓ చిత్రాన్ని తెరకెక్కిస్తున్నారు. కేవలం రెండు, మూడు రోజుల్లోనే ఈ సినిమా షూటింగ్ పూర్తి చేశారు. ప్రస్తుతం పోస్ట్ ప్రొడక్షన్ పనులు జరుగుతున్నాయి.
ఈ సినిమాకు సంబంధించిన తొలి పాటను కూడా విడుదల చేశారు. దీంతో ప్రస్తుతం టాలీవుడ్‌లో ఒక రకమైన ఉత్కంఠభరితమైన పరిస్థితి నెలకొందనే చెప్పుకోవాలి.
అయితే, తాజాగా ఈ చిత్రానికి సంబంధించి ఓ ఆసక్తికర వార్త వైరల్ అవుతోంది. 'పరాన్నజీవి' చిత్రంలో శ్రీరెడ్డి కూడా నటించిందనేదే ఆ వార్త. ఈ అంశంపై ఆమె క్లారిటీ ఇస్తూ, ఈ వార్తలో ఎలాంటి నిజం లేదని చెప్పింది.
రామ్ గోపాల్ వర్మ అంటే తనకు చాలా ఇష్టమని... అలాంటప్పుడు ఆయనకు వ్యతిరేకంగా తీస్తున్న సినిమాలో ఎలా నటిస్తానని ప్రశ్నించింది. ఈ సినిమా కోసం తనను సంప్రదించిన మాట వాస్తవమేనని... కానీ, వర్మకు వ్యతిరేకంగా తాను నటించనని చెప్పింది.
