మెగాస్టార్ చిరంజీవి రీ ఎంట్రీ 150వ చిత్రం ఇటీవ‌లే ప్రారంభోత్స‌వం జ‌రుపుకుంది. కోలీవుడ్ హిట్ మూవీ 'క‌త్తి' సినిమాను తెలుగులో 'కత్తిలాంటోడు' పేరుతో రీమేక్ చేస్తున్నారు. వి.వి.వినాయక్ దర్శకత్వంలో ఈ చిత్రం తెరకెక్కుతోంది. ప్రస్తుతం ఈ చిత్రానికి సంబంధించి నటీనటుల ఎంపిక శరవేగంగా జరుగుతోంది. అందులో భాగంగా ఈ సినిమా కోసం అనుష్కను హీరోయిన్‌గా తీసుకుంటున్నట్టు టాలీవుడ్ వర్గాల విశ్వసనీయ సమాచారం. దేవీశ్రీ ప్రసాద్ ఈ చిత్రానికి సంగీతం సమకూరుస్తున్నారు.
ఇప్పుడు ఈ సినిమా కోసం చిరు టీం ఓ రేంజ్‌లో క‌స‌ర‌త్తులు చేస్తోంది. ఈ సినిమాలో చిరుతో సమానమైన విలన్ కోసం అన్వేష‌ణను జరుపుతోంది. ఒకప్పుడు ఫ్యామిలీ హీరోగా మగువల హృదయాల్ని కొల్లగొట్టి ఇప్పుడు విలన్‌గా కూడా సత్తా చాటుతున్న జగపతి బాబు, చిరంజీవి 150వ చిత్రంలో విలన్‌గా నటించబోతున్నాడనే వార్తలు టాలీవుడ్‌లో హల్‌చల్ చేస్తున్నాయి.
గతంలో నందమూరి బాలకృష్ణ హీరోగా నటించిన 'లెజండ్' చిత్రంలో జగ్గుబాయ్ విలన్‌గా నటించి మంచి పేరుతో పాటు.. మార్కులు కొట్టేసిన విషయం తెల్సిందే. ఆ తర్వాత ఎన్టీఆర్ 'నాన్నకు ప్రేమతో' చిత్రంలో విలన్‌గా నటించి తనేంటో నిరూపించుకున్నాడు. ఇప్పుడు చిరు 150వ చిత్రంలో విలన్‌గా నటించే అవకాశం జగపతిబాబును వెతుక్కుంటూ వచ్చింది.
ఈ సినిమాలోని విలన్ పాత్రకు జగపతిబాబు అయితే పూర్తి న్యాయం చేయగలుగుతాడని భావించిన వినాయక్, ఇదే విషయాన్ని చిరుకి చెప్పారట. దీంతో మారుమాట మాట్లాడకుండా చిరు గ్రీన్ సిగ్నల్ ఇచ్చేశాడట. నందమూరి హీరోలతో వరుసగా విలన్‌గా నటించిన జగపతిబాబు ఇప్పుడు మెగాహీరోతో నటించడానికి సిద్ధమవుతున్నాడు. మరి ఈ సినిమా జగపతిబాబు రేంజ్‌ని ఇంకెంత పెంచుతుందో వేచి చూడాల్సిందే.
