హైదరాబాదులో చైన్ స్నాచింగ్‌ ఘటన కలకలం రేపిన సంగతి తెలిసిందే. మహానగరంలో వరుస చైన్ స్నాచింగ్‌లకు పాల్పడిన నిందితుడిని పోలీసులు గుర్తించారు. నిందితుడు రాజస్తాన్‌కు చెందిన ఉమేష్ ఖతిక్ అని పోలీసులు ఫొటోను విడుదల చేశారు. ఈ నెల 19న ఒక్క రోజే హైదరాబాద్‌లో పలు చోట్ల స్నాచింగ్‌లతో ఉమేష్ కలకలం సృష్టించాడు.
మూడు కమిషనరేట్ల పరిధిలో ఈ చోరీలకు పాల్పడ్డాడు. గుజరాత్, మహారాష్ట్రలో కూడా ఉమేష్ ఖతిక్‌పై చోరీ కేసులు ఉన్నాయి. ఈ నెల 18న హైదరాబాద్‌కు వచ్చిన ఉమేష్.. ఆ మరుసటి రోజు చైన్న స్నాచింగ్‌లకు పాల్పడ్డాడు. అనంతరం అతడు వరంగల్ వెళ్లి అక్కడి నుంచి ఇతర రాష్ట్రాలకు వెళ్లిపోయినట్టుగా పోలీసులు భావిస్తున్నారు. ఈ క్రమంలోనే అతడిని పట్టుకునేందకు పోలీసులు గాలింపు చర్యలు చేపట్టారు.
పోలీసులు విచారణలో భాగంగా ఆయా ప్రాంతాల్లో ఉన్న సీసీ కెమెరా ఫుటేజ్ ల‌ను ప‌రిశీలించారు. ఈ దొంగ‌త‌నాలకు నిందితుడు ఒకే బైక్‌ను ఉప‌యోగించిన‌ట్టు నిర్దారించుకున్నారు. అయితే ఆ బైక్‌ను నిందితుడు దొంగిలించినట్టుగా పోలీసులు విచారణలో తేలింది.
