తెలంగాణ ప్రాంతానికి చెందిన సీనియర్ నేత, ఎంపీ కోమటిరెడ్డి వెంకట్ రెడ్డికి కాంగ్రెస్ పార్టీ అధిష్టానం కీలక బాధ్యతలను అప్పగించింది. వచ్చే యేడాది అసెంబ్లీ ఎన్నికలు జరుగనున్న నేపథ్యంలో పార్టీని మరింత బలోపేతం చేసేలా చర్యలు చేపట్టింది. ఇందులోభాగంగా, సీనియర్ నేత, ఎంపీ కోమటిరెడ్డి వెంకట్ రెడ్డిని కాంగ్రెస్ తెలంగాణ రాష్ట్ర స్టార్ క్యాంపెయినర‌గా నియమిస్తూ కాంగ్రెస్ పార్టీ జాతీయ ప్రధాన కార్యదర్శి కేసీ. వేణుగోపాల్ ఆదేశాలు జారీశారు. ఈ ఉత్తర్వులు తక్షణం అమల్లోకి వస్తాయని పేర్కొన్నారు. పార్టీ అధినేత్రి సోనియా గాంధీ ఆమోదంతో ఈ నిర్ణయం తీసుకున్నట్టు ఆయన విడుదల చేసిన పత్రికా ప్రకటనలో పేర్కొన్నారు.
కాగా, పార్టీ సహచరుడు కొత్త బాధ్యతలు అందుకుంటున్న తరుణంలో టీపీసీసీ చీఫ్ రేవంత్ రెడ్డి స్పందించారు. తెలంగాణలో పార్టీ స్టార్ క్యాంపెయినర్‌గా నియమితులైనందుకు హృదయపూర్వక శుభాకాంక్షలు సోదరా అంటూ ట్వీట్ చేస్తూ, కేసీ వేణుగోపాల్ జారీ చేసిన నియామక ఉత్తర్వులను జతచేశారు.
