బిర్యానీ ప్రియుల సంఖ్య రోజు రోజుకీ పెరిగిపోతోంది. ముఖ్యంగా హైదరాబాద్ బిర్యానీ అంటే చాలామంది ఇష్టపడి తింటున్నారు. ఇటీవల నగరంలోని కొన్ని హోటళ్లకు చెందిన బిర్యానీ పార్సిళ్లలో వింత వింత వస్తువులు, జీవులు కనిపించడం వినేవుంటాం. తాజాగా అలాంటి ఘటనే హైదరాబాదులో చోటుచేసుకుంది. వివరాల్లోకి వెళితే, హైదరాబాద్ - వనస్థలిపురం సచివాలయం నగర్‌లోని అతిథి బిర్యానీ సెంటర్‌కు మేఘన అనే యువతి బిర్యానీ తినేందుకు వెళ్లింది.
అయితే చికెన్ బిర్యానీ తింటుండగా.. లెగ్ పీస్‌పై కోడి ఈకలు రావడంతో మేఘన సిబ్బందిని ప్రశ్నించింది. యాజమాన్యం నిర్లక్ష్యంగా సమాధానం ఇవ్వడంతో మేఘన ఫుడ్ సేఫ్టీ అధికారులకు ఫిర్యాదు చేసింది. బిర్యానీలోని లెగ్ పీస్‌లను బయటికి తీయగా.. వాటితో పాటూ వచ్చిన వాటిని చూసి కస్టమర్లు ఖంగుతిన్నారు.
ఇందుకు సంబంధించిన వార్త ప్రస్తుతం సోషల్ మీడియాలో తెగ వైరల్ అవుతోంది. దీనిపై హోటల్ యాజమాన్యాన్ని ప్రశ్నించగా.. నిర్లక్ష్యంగా సమాధానం ఇచ్చారు. దీనిపై నెటిజన్లు వివిధ రకాలుగా స్పందిస్తున్నారు.
