సాధారణంగా శనగపప్పులో ఫైబర్ ఉంటుంది. ఈ పప్పును డైట్‌లో చేర్చుకోవడం ద్వారా శరీరానికి కావలసిన పోషకాలు లభిస్తాయి. అలాంటి శనగపప్పుతో నూనె పదార్థాలు కాకుండా ఆవిరి మీద ఉడికించే కుడుములు ఎలా తయారు చేయాలో చూద్దాం..!
కావలసిన పదార్థాలు:
శనగపప్పు - 1 కప్పు
బెల్లం - ఒక కప్పు
బియ్యంపిండి - 2 కప్పులు
తాజా కొబ్బరి తురుము -1 కప్పు
యాలకుల పొడి - తగినంత
నెయ్యి - తగినంత
తయారీ విధానం:
శనగపప్పులో తగినంత నీరు పోసి కుక్కర్‌లో ఉడికించుకోవాలి. పప్పు మరీ మెత్తగా కాకుండా మితంగా ఉడికించుకోవాలి. ఉడికించిన తరువాత పప్పును చల్లార్చి పొడి చేసుకోవాలి. ఒక గిన్నెలో బెల్లం, నీళ్లు పోసి పాకం పట్టాలి. ఆ పాకంలో శనగపప్పు పొడి, యాలకుల పొడి, కొబ్బరి తురుము వేసుకుని కలుపుకోవాలి. ఈ మిశ్రమం చిక్కబడేవరకూ సన్నని మంటపై ఉడికించుకోవాలి. మిశ్రమం గట్టిపడ్డాక స్టవ్ ఆర్పేయాలి.
ఈ మిశ్రమాన్ని ఉండలు కట్టుకుని పక్కనుంచుకోవాలి. ఇంకొక పాత్రలో నీళ్లు, నెయ్యి, వేసి మరిగించాలి. బియ్యంపిండిని ఓ గిన్నెలో తీసుకుని మరిగించిన నీటిని చేర్చుతూ పిండి కలుపుకోవాలి. ఇప్పుడు చేతికి నూనె పూసుకుని పిండిని ఉండలుగా చేసుకోవాలి. ఉండలను చేయితో చిన్న పూరీల్లా వత్తుకుని వాటి మధ్యలో శనగపిండి ఉండను ఉంచి గుండ్రంగా చుట్టాలి. ఇలా తయారుచేసిపెట్టుకున్న కుడుములను 10 -12 నిమిషాలపాటు ఆవిరి మీద ఉడికించి చల్లారాక వడ్డించాలి. అంతే కుడుములు రెడీ.
