Publish Date: Mon, 21 Dec 2020 (22:03 IST)
Updated Date: Tue, 22 Dec 2020 (18:22 IST)
ధనుర్మాసం ప్రారంభం అయిన దగ్గర్నుంచి ఇంటి లోగిళ్లు ముగ్గులతో కళకళలాడుతాయి. ఇంటి ఇల్లాలు తమ ఇంటి ముందు గొబ్బెమ్మలతో రంగవల్లికలను వేస్తుంటారు.
ధనుర్మాసం ఆరంభం నుంచి తెలుగు వాకిళ్లు ముగ్గులతో ముచ్చటగొలుపుతాయి. సంక్రాంతి లక్ష్మికి ఆహ్వానం పలుకుతుంటాయి. అయితే సంక్రాంతి ముగ్గులో ఎన్నో అర్థాలు... అంతరార్థాలు ఉన్నాయి. ఇంటి ముందు పేడతో కలిపిని నీళ్లు చల్లిన వాకిలి మేఘాలు లేకుండా స్వచ్చంగా ఉన్న ఆకాశానికి సంకేతమని శాస్త్ర వచనం.
అదేవిధంగా ముగ్గులో ఓ క్రమపద్ధతిలో పెట్టిన చుక్కలు రాత్రివేళ ఆకాశంలో కనబడే నక్షత్రాలకు సంకేతాలు. ఇక ఆ చుక్కలను గడులలో ఇమిడ్చిన ముగ్గు విశ్వంలో ఎప్పటికప్పుడు సంభవించే మార్పులకు సూచికలని చెపుతారు.
అందంగా తీర్చిదిద్దిన ముగ్గుకి ఎటుచూసినా మధ్యస్థ స్థానంలో కనిపించే చుక్క ఉన్న గడి సూర్య భగవానుని స్థానానికి సూచిక. ఇలా సంక్రాంతిలో వేసే ఒక్కో ముగ్గులో ఒక్కో అర్థం ఇమిడి ఉంది.
