భద్రాచలం శ్రీ సీతారామచంద్ర స్వామి వారి దేవస్థానం గర్భగుడిపై ఉన్న సుదర్శన చక్రం గురించి తెలుసుకోవాలంటే ఈ కథనం చదవాల్సిందే. శ్రీ కంచర్ల గోపన్న( భక్త రామదాసు) గారి వంశీకుడైన శ్రీ కంచర్ల శ్రీనివాసరావు గారు ఇచ్చిన వివరణ ఆధారంగా.. భద్రాచలం గర్భగుడిపై వున్న సుదర్శన చక్రం గురించి తెలుసుకుందాం.. ముఖ్యంగా భద్రాచలం శ్రీ సీతారామచంద్ర స్వామి వారి దేవస్థానం గర్భగుడిపై ఉన్న సుదర్శన చక్రాన్ని ఎవ్వరూ తయారు చేయలేదట.
మరి ఇదెలా వచ్చిందంటే.. భక్త రామదాసు తాను ఆలయం నిర్మించిన తర్వాత ఆలయం పైభాగాన సుదర్శన చక్రం ప్రతిష్ఠించడానికై గొప్ప గొప్ప లోహ శిల్పులను తెప్పించి వారిచేత సుదర్శన చక్రాన్ని తయారు చేయించారట.
కానీ ఎన్నిసార్లు ప్రయత్నించినా అది విరిగిపోవడం.. సరైన ఆకృతి చేయడం వంటివి జరిగాయట. దీంతో కలత చెందిన రామదాసు కలలో ఆ రాత్రి శ్రీరామచంద్రుడు ప్రత్యక్షమై "భక్తా..!! సుదర్శన చక్రం అంటే మహిమాన్వితమైనది దాన్ని సామాన్య మానవులు నిర్మించలేరు. అందుకే నేను నీకు నా సుదర్శన చక్రాన్ని ఇస్తున్నాను అది గోదావరిలో ఉంది తెచ్చి ప్రతిష్ఠించు" అని చెప్పాడు.
మరుసటి రోజు గజ ఈతగాళ్ళతో రామదాసు గోదావరిలో వెతికించాడు. కానీ కనిపించలేదు. మళ్లీ రాముడు కలలో కనిపించి "అది నామీద అమితమైన భక్తిని పెంచుకున్న నీకు మాత్రమే కనిపిస్తుంది" అని చెప్పడంతో స్వయంగా రామదాసే వెళ్ళి గోదావరి మాతకు నమస్కరించి రామచంద్రుని స్తోత్రం చేసి గోదావరిలో చేతులు పెట్టగా వచ్చి ఆ సుదర్శన చక్రం చేతిలో ఆగింది.
ఆ సుదర్శన చక్రమే ఇప్పుడు మనం చూస్తున్నది. ఇంతటి ప్రాశస్త్యం ఉన్న సుదర్శన చక్రాన్ని దర్శించుకుంటే సమస్త శుభాలు చేకూరుతాయని విశ్వాసం. ఇలాంటి పలు మహిమాన్వితమైన అంశాలుండటంతోనే.. భద్రాద్రి మహా పుణ్యక్షేత్రమై భాసిల్లుతోంది.
