నిండు పౌర్ణమి. పిండి వెన్నెల.. అది కూడా మాఘ మాసం. ఇంకా మంచు తెరలు తొలగి నులివెచ్చని పిల్లగాలులు. ఇలా చెప్పుకుంటూ పోతే వెన్నెల రాజు చందమామ అందాన్ని ఎంత చెప్పినా ఇంకా చెపుతూనే వుండాలనిపిస్తుంది. ఈ మానవకోటి అవతరించిన దగ్గర్నుంచి ఆ వెన్నెల మామ చందమామ గురించి చెప్పిన మాటలు, కవితలు, పాటలు... ఎన్నో ఎన్నెన్నో.
ఇక అసలు విషయానికి వస్తే... ఫిబ్రవరి 19, అంటే రేపు పౌర్ణమి. అంతేగా... అనుకునేరు. ఇది అలాంటిది ఇలాంటిది కాదు, 40 ఏళ్ల తర్వాత వస్తున్న సూపర్ స్నో మూన్ నిండు పౌర్ణమి. తన వెన్నెల అందాన్నంతా ఎంతో దగ్గరగా మన వద్దకు తెస్తున్న చందమామ అందం చూసే అద్భుతమైన రోజు.
రేపు చంద్రుడు భూమికి చాలా దగ్గరగా వస్తున్నాడు. సుమారు 2 లక్షల 20 వేల మైళ్ల దూరంలో చందమామ కనువిందు చేయనున్నాడు. ఈ నిండు పౌర్ణమిని గతంలో 1979లో చూడటం జరిగింది. మళ్లీ ఈనాటికి మరోసారి చంద్రుడు కనువిందు చేయనున్నాడు. మరి ఆస్వాదించేందుకు సిద్ధమైపోదామా...
