మహిళలపై వేధింపులు పెచ్చరిల్లిపోతున్నాయి. ఇలా పెళ్లై పిల్లలున్న ఓ వ్యక్తి.. ప్రేమిస్తున్నానని, పెళ్లి చేసుకుంటానని.. ఇందుకు అంగీకరించండంటూ ఇంటికొచ్చి మరీ అడిగాడు. ఇందుకు పెద్దలు అంగీకరించకపోవడంతో.. సదరు మహిళను వేధించడం మొదలెట్టాడు. అంతే మనస్తాపానికి గురైన 22 ఏళ్ల యువతి ఆఫీసులోనే సీలింగ్ ఫ్యానుకు ఉరేసుకుంది.
అయితే విషయం గుర్తించిన సాటి సిబ్బంది వెంటనే యువతిని రక్షించి ఆసుపత్రికి తరలించి పోలీసులకు సమాచారం ఇచ్చారు. లైంగిక వేధింపులకు గురి చేస్తున్నాడని ఇలా ఆత్మహత్యాయత్నానికి పాల్పడిన ఘటన బెంగళూరులో చోటుచేసుకుంది. ఉరి వేసుకుని ఆత్మహత్యాయత్నం చేసిన యువతి పరిస్థితి విషమంగా ఉండటంతో చికిత్స చేయిస్తున్నామని పోలీసులు తెలిపారు.
వివరాల్లోకి వెళితే.. దోమ్మలూరులోని బీడీఏ లేఔట్‌లో కిరణ్ కుమార్ అనే వ్యక్తి ప్రైవేటు కార్యాలయం నిర్వహిస్తున్నాడు. బీడీఏ లేఔట్ సమీపంలోనే కిరణ్ కుమార్ నివాసం ఉంటున్నాడు. కిరణ్ కుమార్‌కు వివాహం అయ్యి భార్య, ఒక పాప ఉంది. అయితే కార్యాలయంలో పని చేస్తున్న యువతి మీద కిరణ్ కుమార్ కన్ను వేశాడు. ఆమెను ప్రేమించాలని ఒత్తిడి చేశాడు.
అంతేకాకుండా యువతిని కిరణ్ కుమార్ లైంగిక వేదింపులకు గురి చెయ్యడంతో యువతి జీవితం మీద విరక్తి పెంచుకుంది. ఇంకా ఇంటికొచ్చి పిల్లనిమ్మని తల్లిదండ్రులను అడిగాడు. వారు కాదనేసరికి ఆఫీసులో వేధింపులకు గురిచేశాడు. దీంతో సదరు యువతి మనస్తాపంతో ఆఫీసులో ఉరేసుకుంది.
