పార్లమెంట్ బడ్జెట్ సమావేశాలు ఈ నెల 31వ తేదీ నుంచి ప్రారంభంకానున్నాయి. రెండు దఫాలుగా ఈ సమావేశాలు జరుగనున్నాయి. తొలి దఫా సమావేశాలు జనవరి 31వ తేదీ నుంచి ఫిబ్రవరి 10వ తేదీ వరకు, రెండో దఫా సమావేశాలు 15 రోజుల విరామం తర్వాత జరుగుతాయి. ఫిబ్రవరి 1వ తేదీన పార్లమెంట్‌లో కేంద్ర విత్తమంత్రి నిర్మలా సీతారామన్ 2023-24 సంపత్సరానికి సంబంధించి వార్షిక బడ్జెట్‌ను ప్రవేశపెడతారు.
మరోవైపు, ఈ బడ్జెట్ సమావేశాల్లోపు కేంద్ర మంత్రివర్గ పునర్వ్యవస్థీకరణ జరగనున్నట్లు సమాచారం. 31 నుంచి జరిగే పార్లమెంట్ బడ్జెట్ సమావేశాలలోపే ఈ కార్యక్రమాన్ని చేపట్టే అవకాశాలున్నట్లు ప్రచారం సాగుతోంది. సంక్రాంతి పండగ నుంచి బడ్జెట్ సమావేశాలు ప్రారంభమయ్యేలోపు మంత్రివర్గ పునర్వ్యవస్థీకరణ జరిపేందుకు ప్రధాని నరేంద్ర మోడీ సన్నాహాలు చేస్తున్నారు.
ఈ ఏడాది జరిగే అసెంబ్లీ ఎన్నికలు, వచ్చే ఏడాది జరిగే సార్వత్రిక ఎన్నికలను దృష్టిలో ఉంచుకుని పునర్వ్యవస్థీకరణ జరుగుతుందన్నారు. దీంతో ఈ ఏడాది ఎన్నికలు జరగనున్న తెలంగాణతో పాటు మధ్యప్రదేశ్‌ తదితర రాష్ట్రాలకు క్యాబినెట్‌ పునర్వ్యవస్థీకరణలో ప్రాతినిధ్యం కల్పిస్తారని భావిస్తున్నారు. తెలంగాణ నుంచి బీసీ నేతకు మంత్రివర్గంలో స్థానం కల్పించవచ్చని చర్చ జరుగుతోంది.
