భారత రక్షణ శాఖ మరింత బలోపేతం దిశగా అడుగులు వేస్తోంది. ఇప్పటికే ఫ్రాన్స్ కొనుగోలు చేసిన అత్యాధునిక రాఫెల్ యుద్ధ విమానాలు దేశ రక్షణ శాఖలోకి వచ్చి చేరాయి. ఇపుడు మరో మూడు విమానాలు వచ్చాయి. ఈ మూడు విమానాలు ఫ్రాన్స్ నుంచి భారత్‌కు నాన్‌స్టాఫ్‌గా ప్రయాణం చేయడం గమనార్హం. ఈ మూడింటితో కలిపి మొత్తం 8 రాఫెల్ ఫైటర్ జెట్స్ ఇప్పుడు వాయుసేన అమ్ములపొదిలో ఉన్నట్లయింది.
ఈ విమానాలు గుజరాత్ రాష్ట్రంలోని జామ్ నగర్‌లో ల్యాండ్ అయ్యాయని ఇండియన్ ఎయిర్ ఫోర్స్ ప్రకటించింది. బుధవారం రాత్రి 8.14 గంటల సమయంలో రెండో బ్యాచ్ రాఫెల్ విమానాలు ఇండియాకు చేరాయని ఐఏఎఫ్ తన అధికారిక ట్విట్టర్ ఖాతాలో వెల్లడించింది.
ఈ విమానాలకు అవసరమైన అదనపు ఇంధనాన్ని ఫ్రాన్స్ ఎయిర్ ఫోర్స్, మార్గమధ్యంలో గాల్లోనే నింపిందని వాయుసేన ప్రకటించింది. ఫ్రాన్స్‌లోని ఇస్ట్రీస్ ఎయిర్ బేస్ నుంచి బయలుదేరిన ఇవి 8 గంటలకు పైగా ప్రయాణించాయని, మొత్తం 3,700 నాటికల్ మైళ్ల దూరాన్ని సునాయాసంగా ప్రయాణించాయని పేర్కొంది.
కాగా, మొత్తం రూ.59 వేల కోట్లతో 36 విమానాలను భారత్ కొనుగోలు చేసిన సంగతి తెలిసిందే. ఓ వైపు చైనాతో, మరోవైపు పాకిస్థాన్‌తో సరిహద్దుల్లో సవాళ్లు ఎదురవుతున్న వేళ, ఈ విమానాలు మరింత బలాన్నిస్తాయని నిపుణులు అంచనా వేస్తున్నారు. ఇక, కొత్తగా విమానాలు రావడంపై స్పందించిన రక్షణ మంత్రి రాజ్‌నాథ్ సింగ్, వాయుసేనకు అభినందనలు తెలిపారు.
