ఎనిమిది కోట్ల రూపాయలకు కొన్న అలస్కాన్ జాతి కుక్క తప్పిపోయిందంటూ పోలీసులకు ఫిర్యాదు చేసిన బెంగళూరు వ్యక్తి ఇప్పుడు సంతోషంగా వున్నాడు. ఎందుకంటే ఆ కుక్క తిరిగి ఇంటికి వచ్చేసింది. ఇక అసలు విషయానికి వస్తే ఆ కుక్క ఖరీదు రూ. 8 కోట్లు ఏమిటి అనే సందేహం చాలామందికి ఉదయించింది కదూ.
బెంగళూరులోని చేతన్ బనశంకరి, శ్రీనగర్ నివాసి. ఇతడు చైనా నుంచి అలస్కాన్ జాతికి చెందిన ఆడ కుక్కను రూ. 8 కోట్లకు కొన్నాడు. ఇలా ఎందుకంటే... ఆ కుక్క జన్మనిచ్చిన తర్వాత అన్ని పిల్లలను అమ్మకందారునికి తిరిగి ఇస్తానన్న షరతుతో 8 కోట్ల రూపాయలు చెల్లించి చేతన్, చైనా నుండి కుక్కను కొనుగోలు చేశాడు.
ఈ క్రమంలో ఆ కుక్క కనిపించకుండా పోయింది. ఆ ఘటన తెలుసుకుని బెంబేలెత్తిపోయిన యజమాని హనుమంతనగర్ పోలీస్ స్టేషనులో ఫిర్యాదు చేశాడు. కుక్క కోసం పోలీసులు గాలింపు చర్యలు చేపడుతుండగా ఓ రోజు తెల్లవారు జామున కుక్క మళ్లీ ఇంటి ప్రాంగణంలో తిరుగుతూ కనిపించింది. దీనితో తప్పిపోయిన కుక్క మళ్లీ వచ్చినందుకు అతడు సంతోషపడ్డాడు.
