హిజాబ్ వేసుకోలేదని భార్యను కిరాతకంగా చంపేశాడు.. ఓ వ్యక్తి. ఇస్లాం సంప్రదాయాల్ని పాటించడానికి భార్య అంగీకరించలేదు. దీంతో తీవ్ర కోపానికి గురైన ఆ వ్యక్తి కత్తితో పొడిచి చంపాడు. నిజానికి ఈ బుర్ఖా విషయం మీదే గొడవై కొద్ది రోజుల క్రితమే వీరు విడిపోయారు. అయితే తాజాగా విడాకులకు సంబంధించిన విషయమై కలుసుకుని మాట్లాడుకునే సందర్భంలో ఇది జరిగింది.
వివరాల్లోకి వెళితే.. నిందితుడు ఇక్బాల్ షైక్(36). టాక్సీ నడుపుతుంటాడు. బాధితురాలి పేరు రూపాలి(20). ఈమె హిందూ మహిళ. 2019లో ఇక్బాల్ను వివాహం చేసుకున్న అనంతరం జరాగా పేరు మార్చుకుంది. 2020లో వీరికి ఒక కుమారుడు పుట్టాడు. ముంబైలో నివాసం ఉంటారు. కాగా రూపాలి బుర్ఖా ధరించాలంటూ ఇక్బాల్ కుటుంబం ఒత్తిడి తీసుకువచ్చింది. ఇక్బాల్ సైతం ఈ విషయంలో మొండిగా వ్యవహరించడంతో కొద్ది రోజుల క్రితమే వీరు విడిపోయారు.
కాగా, తనకు విడాకులు కావాలని రూపాలి డిమాండ్ చేస్తుండడంతో ఈ విషయమై చర్చించడానికి వీరు కలుసుకున్నారు. కానీ గొడవ మళ్లీ మొదలైంది. బుర్ఖా ధరించాల్సిందేనని నిందితుడు పట్టుబట్టాడు. అందుకు మృతురాలు అంగీకరించలేదు. దీంతో ఆవేశానికి గురైన అతను కత్తితో ఆమెపై దాడి చేశాడు. ఈ దాడిలో ఆమె మృతి చెందింది. ఈ ఘటనపై సమాచారం అందుకున్న పోలీసులు ఇక్బాన్ను అరెస్ట్ చేసి 302 కింద కేసు నమోదు చేసి విచారిస్తున్నారు.
