భార్యను కాటేసిన పామును పట్టుకుని ఆస్పత్రికి వచ్చిన భర్త.. ఆయన చెప్పింది విని వైద్యుల షాక్

తన భార్యను ఓ పాము కాటేసింది. దీంతో కాటేసిన పామును పట్టుకుని సంచిలో వేసుకుని భార్యను తీసుకుని భర్త ఆస్పత్రికి వచ్చాడు. తన భార్యను పాము కరిచిందని, అందుకే ఆ పామును కూడా పట్టుకుని ఆస్పత్రికి వచ్చినట్టు వైద్యులకు చెప్పాడు. పైగా ఏ పాము కరిచిందే తెలిస్తే అందుకు తగిన విధంగా వైద్యం చేయొచ్చని పామును పట్టుకుని తెచ్చినట్టు వైద్యులకు చెప్పాడు. ఈ మాటలు విన్న  వైద్యులు షాక్‌కు గురయ్యారు. పామును చూసిన వైద్య సిబ్బంది భయంతో పరుగులు తీశారు. ఈ ఘటన ఉత్తరప్రదేశ్ రాష్ట్రంలోని ఉన్నావ్ జిల్లాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, 

జిల్లాలోని ఉమన్ అత్వా గ్రామానికి చెందిన నరేంద్ర - కుష్మా అనే దంపతులు ఉన్నారు. కుష్మా తన ఇంటి పరిసరాలను శుభ్రం చేస్తుండగా, ఆమెను పాము కాటేసింది. దీంతో ఆమె గట్టిగా అరుస్తూ కుప్పకూలి స్పృహ కోల్పోయింది. ఆమె అరుపులు విన్న ఇరుగుపొరుగు వారు వెంటనే స్పందించి అంబులెన్స్‌లో ఆస్పత్రికి తరలించారు. 

ఈ విషయం తెలుసుకున్న భర్త.. ఆస్పత్రికి వెళ్లకుండా నేరుగా ఇంటికి వచ్చి ఇంటి పరిసరాల్లోదాగివున్న పామును వెతికి పట్టుకున్నాడు. ఆపై దానిని సంచిలో వేసుకుని ఆస్పత్రికి వెళ్లాడు. సంచిలోని పామును చూసిన వైద్యులు భయభ్రాంతులకు గురయ్యారు. పామును ఆస్పత్రికి ఎందుకు తీసుకొచ్చావ్ అని ప్రశ్నిస్తే, ఆయన ఇచ్చిన సమాధానం విన్న వైద్యులు, ఆస్పత్రి సిబ్బంది విస్తుపోయారు.

ఏ పాము కాటేసిందో తెలిస్తే అందుకు తగ్గట్టుగా వైద్యం చేసే వీలుంటందన్న ఉద్దేశ్యంతో దానిని తెచ్చినట్టు చెప్పడంతో వైద్యులు ఆశ్చర్యపోయారు. ప్రస్తుతం కుష్మా ఆరోగ్యం నిలకడగానే ఉందని, ఆమెకొచ్చిన ప్రమాదం ఏమీ లేదని వైద్యులు చెప్పడంతో ఆ వ్యక్తి పామును తీసుకెళ్లి అడవిలో వదిలివేశాడు.