మనకు తెలియని ఒక విషయం గురించి తెలుసుకోవాలంటే మన ముందున్న ఏకైక మార్గం యూట్యూబ్. ఇందులో దేన్ని ఎలా తయారు చేయాలో క్షుణ్ణంగా తెలుసుకోవచ్చు. ఈ కోవలోనే యూట్యూబ్ వీడియో చూసి ఓ యువకుడు క్యారెట్ బీర్ తయారు చేశాడు. ఈ విషయం పోలీసులకు తెలిసి కటకటాలపాలయ్యాడు.
తాజాగా వెలుగులోకి వచ్చిన ఈ వివరాలను పరిశీలిస్తే, తమిళనాడు రాష్ట్రం తిరుచ్చికి సమీపంలోని నాచ్చికుప్పం అనే ప్రాంతానికి చెందిన సుకుమార్ (25) అనే యువకుడు లాక్‌డౌన్ కాలాన్ని క్యాష్‌గా మార్చుకోవాలని ప్రయత్నించాడు. ఎందుకంటే... అనేక మంది మద్యం లేక విలవిల్లాడిపోతున్నారు.
దీంతో యూట్యూబ్ చూసి క్యారెట్ బీర్ తయారు చేశాడు. క్యారెట్ జ్యూస్‍‌కు ఈస్ట్ అనే రసాయన పౌడర్‌ను చేర్చి రెండు రోజులు మగ్గబెట్టి ఆ తర్వాత తాగితే మత్తు వస్తుందని ఓ యూట్యూబ్ వీడియో చూసి తెలుసుకున్నారు. ఆ ప్రకారంగానే క్యారెట్ బీరు తయారు చేసి విక్రయించడం మొదలుపెట్టారు. ఈ విషయం ఆ నోటా, ఈ నోటాపడి చివరకు పోలీసులకు చేరింది. దీంతో పోలీసులు ఆకస్మికంగా సోదాలు నిర్వహించి తయారు చేసినపెట్టిన క్యారెట్ బీరును స్వాధీనం చేసుకుని, సుకుమార్‌ను అరెస్టు చేశారు. కేసు నమోదు చేసి దర్యాప్తు జరుపుతున్నారు.
