వికీ పీడియా... ఇది ప్రపంచవ్యాప్తంగా పరిచయం ఉన్నదే. ప్రపంచంలోని ఏ సంఘటన, వ్యక్తుల సమాచారం అయినా వికీపీడియాలో నోట్ చేస్తుంటారు. ఆ సమాచారాన్నే చాలామంది అనుసరిస్తూ ఉంటారు. ఇదే తరహాలో ఇప్పుడు కొత్త పదం వచ్చింది. అదే గాంధీపీడియా.
కేంద్ర ప్రభుత్వం ప్రవేశపెట్టిన బడ్జెట్‌లో గాంధీ మహాత్ముని గొప్పతనం తెలియచేయాలనే ఉద్దేశంతో వికీపీడియా తరహాలోనే గాంధీపీడియాను ఏర్పాటు చేయాలని నిర్ణయం తీసుకున్నారు. వ్యక్తులు, పౌరుల నడవడికను మార్చే ఉద్దేశంతో గాంధీజీ పాటించిన విలువల ఆధారంగా గాంధీపీడియా సృష్టి జరుగుతోందని చెప్పారు.
మహాత్మా గాంధీజీ జీవిత చరిత్ర గురించి ప్రపంచవ్యాప్తంగా తెలియజేయాలని కేంద్రం భావిస్తోంది. స్వాతంత్య్రం కోసం ఆయన చేసిన కృషిని భారత సమాజం గుర్తుపెట్టుకోవడం కోసం గాంధీపీడియా ఏర్పాటు చేస్తున్నట్లు ఆర్థికమంత్రి నిర్మలా సీతారామన్ తెలియజేశారు.
ప్రతి ఏటా అక్టోబర్‌ 2న గాంధీజీ జయంతిని దేశవ్యాప్తంగా జరుపుకుంటారు. అయితే ఈసారి జరుపుకోబోయేది 150వ జయంతి కావడం ఒక ప్రత్యేకత. ఈ సందర్భంగా గాంధీజీ 150వ జయంతిని పురస్కరించుకొని గాంధీపీడియా ద్వారా మహాత్ముని విలువలు, ఆయన గొప్పతనంతో పాటు ఆయన చేసిన బోధనలను కూడా ప్రచారం చేయాలని నిర్ణయించినట్లు తెలిపారు.
