పీకల వరకు మద్యం సేవించి హాస్టల్‌లో నగ్నంగా నిద్రపోయిన స్కూల్ హెడ్మాస్టర్ బాగోతం తాజాగా వెలుగులోకి వచ్చింది. ఈ తంతుకు సంబంధించి వీడియో ఒకటి వైరల్ కావడంతో విద్యాశాఖ ఉన్నతాధికారులు స్పందించి, సదరు హెడ్మాస్టర్‌ను సస్పెండ్ చేస్తూ ఉత్తర్వులు జారీ చేశారు. ఈ ఘటన ఉత్తరప్రదేశ్ రాష్ట్రంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
రాష్ట్రంలోని బాహఖ్ జిల్లా విశేశ్వర్ గంజ్ బ్లాక్‌లోని శివపూర్ బైరాగీ పాఠశాలలో ఓ హెడ్మాస్టర్ పూటుగా తాగి నగ్నంగా నిద్రిపోయాడు. దీన్ని కొందరు విద్యార్థులు వీడియో తీసి సోషల్ మీడియాలో షేర్ చేశారు. దీంతో ఈ వీడియో కాస్త వైరల్ అయింది.
హెడ్మాస్టర్ తీరుపై విద్యార్థుల తల్లిదండ్రులు, గ్రామస్థులు మండిపడుతున్నారు. నిందితుడు దుర్గా జైశ్వాల్ తరచూ పాఠశాలలో అసభ్యకరమైన చర్యలకు పాల్పడేవాడని ఆరోపించారు. పిల్లల ముందు షర్టు తొలగించేవాడని, అతడి తీరుతో బాలికలు స్కూలుకు వెళ్లడం మానేశారని చెప్పారు.
తల్లిదండ్రుల ఫిర్యాదులతో రంగంలోకి దిగిన విద్యాశాఖ దర్యాప్తు నిర్వహించి జైశ్వాల్‌ను సస్పెండ్ చేసింది. శాఖాపరమైన విచారణకు ఆదేశించింది. అవసరమైతే హెడ్మాస్టర్‌పై ఎఫ్ఐఆర్ దాఖలు చేస్తామని బేసిక్ శిక్షా అధికారి (బీఎస్ఏ) వెల్లడించారు.
