తాను ఏ ఒక్క మహిళను కించపరచలేదని, ఆమె స్థానంలో మరో మహిళ లేదా పురుషుడు ఉన్నా తాను అలాంటి వ్యాఖ్యలే చేసేవాడినని కాంగ్రెస్ అధ్యక్షుడు రాహుల్ గాంధీ వ్యాఖ్యానించారు.
రాఫెల్ స్కామ్‌ విషయంలో రక్షణ మంత్రి నిర్మలా సీతారామన్‌ను ఉద్దేశించి రాహుల్ చేసిన వ్యాఖ్యలపై జాతీయ మహిళా సంఘం సుమోటాగా స్వీకరించి ఆయనకు నోటీసులు జారీ చేసింది.
వీటిపై రాహుల్ స్పందించారు. తాను ఏ మహిళనూ ఉద్దేశించి మాట్లాడలేదని, నిర్మలా సీతారామన్ స్థానంలో ఎవరున్నా అలాంటి వ్యాఖ్యలే చేసేవాడినని చెప్పారు. ప్రముఖ పారిశ్రామికవేత్త అనిల్ అంబానీకి 30 వేల కోట్ల రూపాయలను అప్పనంగా కట్టబెట్టి, తనను తాను రక్షించుకోలేక, మరో వ్యక్తిని నరేంద్ర మోడీ సభలోకి పంపారని ఆరోపించారు. ఆ వ్యక్తి మహిళ కావడం యాదృచ్ఛికమేనన్నారు.
56 అంగుళాల ఛాతీ ఉందని చెప్పుకు తిరిగే ఓ కాపలాదారు, మహిళతో తనను కాపాడాలని వేడుకున్నారని, తనను తాను కాపాడుకోలేని స్థితిలో ఉన్న ఆయన, ఓ మహిళను అడ్డు పెట్టుకున్నారని రాహుల్ వ్యాఖ్యానించారు. ఈ వ్యాఖ్యలు రాజకీయ వర్గాల్లో ప్రకంపనలు రేపుతున్నాయి.
