బీహార్‌లో కొత్త సంవత్సరం రోజున ఒక అమానుష ఘటన జరిగింది. నడి రోడ్డుపై దళిత మహిళపై ఓ కానిస్టేబుల్ లాఠీతో విరుచుకుపడ్డాడు. తన వద్ద ఉండే లాఠీతో ఆమెను చావబాదాడు. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అయింది.
సీతామర్హికి చెందిన ఓ బాలిక కిడ్నాప్‌నకు గురైందని పోలీసులు తెలిపారు. ఈ కేసుపై దర్యాప్తు చేపట్టి బాలికను రక్షించినట్లు వెల్లడించారు. కిడ్నాప్‌ వ్యవహారంలో బాలికకు సంబంధించిన పలువురు పోలీస్ స్టేషన్‌కు వచ్చినట్లు తెలిపారు. ఈ క్రమంలోనే వారిలో ఇద్దరు మహిళల మధ్య వాగ్వాదం చోటు చేసుకుందని చెప్పారు.
వారు రోడ్డుపై గొడవకు దిగడంతో.. ఆ ప్రాంతంలో ట్రాఫిక్‌కు ఇబ్బంది ఏర్పడిందన్నారు. పోలీసులు వచ్చినా గొడవ ఆపకపోవడంతో వారిని అక్కడి నుంచి పంపించే ప్రయత్నంలో లాఠీతో కొట్టినట్లు వివరణ ఇచ్చారు. అయితే.. పోలీసుల చర్యను స్థానికులు తీవ్రంగా వ్యతిరేకించారు. ఈ ఘటనపై దర్యాప్తు చేపట్టినట్లు పోలీసు ఉన్నతాధికారులు వెల్లడించారు.
మరోవైపు, నడి రోడ్డుపై ఓ దళిత మహిళను పోలీసు లాఠీతో చితకబాదాడు. ఈ ఘటనపై ప్రతిపక్ష భాజపా ఆగ్రహం వ్యక్తం చేసింది. బిహార్‌లో నేరస్థులు స్వేచ్ఛగా తిరుగుతుంటే.. సామాన్య ప్రజలపై పోలీసులు లాఠీని ప్రయోగిస్తున్నారని ఆ పార్టీ నేతలు మండిపడ్డారు. అయితే, ఈ ఘటనపై పోలీసులు వివరణ ఇచ్చారు.
