ఛత్తీస్‌గడ్ రాష్ట్రంలో దారుణం చోటుచేసుకుంది. సభ్య సమాజం సిగ్గుతో తలదించుకునే ఘటన చోటుచేసుకుంది. ఓ యువతిపై కుమారుడు అత్యాచారానికి పాల్పడుతుంటే వీడియో తీసి బ్లాక్ మెయిల్ చేసింది. సదరు యువతి వద్దనుండి లక్షలాది రూపాయలు కాజేసింది. వివరాల్లోకి వెళితే.. ఛత్తీస్‌గడ్‌లోని బలోడా బజార్ జిల్లాలో ఓ యువకుడు సంపన్న వర్గానికి చెందిన ఒక యువతిని ప్రేమ పేరుతో ముగ్గులోకి దింపాడు.
ఆమె వద్ద నుండి ఎలాగైనా డబ్బు గుంజాలని నిర్ణయించుకున్న అతను పక్కా ప్లాన్ వేశాడు. సంపన్న వర్గానికి చెందిన అమ్మాయి కావడంతో ఆమె నుంచి డబ్బులు లాగేందుకు తల్లితో కలిసి ప్రణాళిక రచించాడు. అందులో భాగంగా ఆ యువతికి మాయమాటలు చెప్పి ఇంటికి తీసుకెళ్ళాడు. ఆపై ఆమెకు మత్తిచ్చి కుమారుడు యువతిపై అత్యాచారానికి పాల్పడ్డాడు. ఆ తతంగాన్ని తల్లి వీడియో తీసింది.
కాసేపటి తర్వాత మత్తు నుండి తేరుకున్న యువతి తనపై అత్యాచారం జరిగిందని గుర్తించి సదరు యువకుడిని నిలదీసింది. ఆపై యువకుడి తల్లి జోక్యం చేసుకుని ఈ మొత్తం ఘటనను వీడియో తీశానని, అడిగినప్పుడల్లా డబ్బులు ఇవ్వకపోతే దానిని బయటపెడతానని బెదిరించింది. దీంతో భయపడిన యువతి నాలుగు లక్షలు ఇచ్చింది.
కానీ తరచూ యువకుడి తల్లి డబ్బు కావాలని బెదిరింపులకు గురిచేయడంతో బాధితురాలు తండ్రికి జరిగిందంతా చెప్పింది. బాధితురాలి తండ్రి చేసిన ఫిర్యాదు మేరకు కేసు నమోదు చేసుకున్న పోలీసులు తల్లీ కొడుకులను అరెస్ట్ చేసి కటకటాల వెనక్కి నెట్టారు.
