బెంగళూరు నగరంలో కురుస్తున్న భారీ వర్షాల కారణంగా మంగళవారం నగరంలో నిర్మాణంలో ఉన్న భవనం కుప్పకూలింది. సుమారు 17 మంది నిర్మాణ కార్మికులు శిథిలాల లోపల చిక్కుకున్నారని అధికారులు తెలిపారు. పోలీసులు, అగ్నిమాపక మరియు అత్యవసర సేవల సిబ్బంది సంఘటనా స్థలం నుండి మూడు మృతదేహాలను స్వాధీనం చేసుకున్నారు.
మరో ముగ్గురిని రక్షించారు. ఇతరుల కోసం సహాయక చర్యలు కొనసాగుతున్నాయి. దీనికి సంబంధించి పోలీసు శాఖ నుంచి అధికారిక ప్రకటన వెలువడాల్సి ఉంది. గాయపడిన భవన నిర్మాణ కార్మికుల్లో ఒకరు శిథిలాల నుంచి బయటకు వచ్చి విషాదం గురించి తెలియజేశారు. ముఖ్యమంత్రి సిద్ధరామయ్య ఈ ఘటనకు సంబంధించిన సహాయక చర్యల ఆరా తీశారు.
మరోవైపు, భారీ వర్షాలతో జలమయమైన కేంద్రీయ విహార్ అపార్ట్‌మెంట్‌లో నివసించిన మాజీ రాష్ట్రపతి దివంగత అబ్దుల్ కలాం బంధువులను అధికారులు సురక్షిత ప్రదేశానికి తరలించినట్లు వర్గాలు ధృవీకరించాయి. దివంగత కలాం బంధువులు, 80 ఏళ్ల బంధువు, ఆమె కుమార్తె అపార్ట్‌మెంట్‌లోని డి6 బ్లాక్‌లో నివసించారు.
అధికారులు వేలాది మంది నివాసితులను వారి ఫ్లాట్ల నుండి పడవల ద్వారా సురక్షిత ప్రాంతాలకు తరలించారు. అధికారుల ఆదేశాల మేరకు వందలాది కుటుంబాలు అపార్ట్మెంట్ నుంచి సురక్షిత ప్రాంతాలకు వెళ్లిపోయాయి. కేంద్రీయ విహార్ అపార్ట్మెంట్ ముంపునకు గురై సరస్సును తలపిస్తోంది.
