తమిళనాడు రాష్ట్రంలో ముఖ్యమంత్రిగా ఎంకే స్టాలిన్ బాధ్యతలు చేపట్టిన డీఎంకే ప్రభుత్వ హయాంలో మహిళలపై లైంగిక వేధింపులు, అత్యాచారాలు పెరిగిపోయానని సినీ నటి, అన్నాడీఎంకే విధాన ప్రచార ఉప కార్యదర్శి గౌతమి ఆరోపించారు. ఇటీవల సీనియర్ సినీ నటుడు సత్యరాజ్, ప్రముఖ న్యూట్రనిస్ట్ దివ్యా సత్యరాజ్ డీఎంకేలో చేరారు. దీనిపై సినీ నటి గౌతమి స్పందించారు.
నటుడు సత్యరాజ్ కుమార్తె డీఎంకేలో చేరిన విషయాన్ని ప్రస్తావిస్తూ ఎవరు ఏ పార్టీలోనైనా చేరొచ్చని, అయితే వారు ప్రజలకు ఏం చేస్తున్నారన్నదే ముఖ్యమని అన్నారు. డీఎంకే అధికారంలోకి వచ్చిన తర్వాత అన్నాడీఎంకే అమలు చేసిన సంక్షేమ పథకాలను తుంగలో తొక్కిందని ఆగ్రహం వ్యక్తం చేశారు.
ఎంజీఆర్ తీసుకొచ్చిన పౌష్టికాహార పథకం ప్రపంచ ప్రసిద్ధి చెందిందని గౌతమి పేర్కొన్నారు. జయలలిత తన హయాంలో తాళికి తంగం, ఉచిత ల్యాప్టాప్, ద్విచక్ర వాహనాలకు రాయితీ తదితర పథకాలు అమలు చేశారని తెలిపారు. పళనిస్వామి హయాంలోనూ పలు సంక్షేమ పథకాలు అమలు చేసిన విషయాన్ని ఈ సందర్భంగా ఆమె గుర్తు చేశారు. ముఖ్యంగా తమిళనాడులో డీఎంకే అధికారంలోకి వచ్చిన తర్వాత రాష్ట్రంలో మహిళలు, చిన్నారులపై లైంగిక వేధింపులు పెరిగాయని ఆరోపించారు.
