గుజరాత్‌లోని భారుచ్‌లోని కోవిడ్ ఆసుపత్రిలో ఘోర ప్రమాదం చోటుచేసుకుంది. శనివారం తెల్లవారుజామున మంటలు చెలరేగడంతో 18 మంది కరోనావైరస్ రోగులు మరణించారు.
COVID-19 వార్డులో తెల్లవారుజామున 1 గంటలకు మంటలు చెలరేగాయి. నాలుగు అంతస్తుల ఆసుపత్రిలో సుమారు 50 మంది ఇతర రోగులు ఉన్నారు. వారిని స్థానికులు, అగ్నిమాపక సిబ్బంది రక్షించినట్లు ఒక అధికారి తెలిపారు.
ఉదయం 6.30 గంటలకు సమాచారం ప్రకారం, విషాదంలో మరణించిన వారి సంఖ్య 18గా ఉంది. మంటలు సంభవించిన వెంటనే ఘటన స్థలానికి చేరుకున్నామనీ, అప్పటికే 12 మంది మృత్యువాత పడ్డారని ఒక పోలీసు అధికారి పిటిఐకి తెలిపారు.
COVID-19 వార్డులోని 12 మంది రోగులు మంటలు, పొగ కారణంగా ఊపిరాడక మరణించారని భరూచ్‌లోని సీనియర్ పోలీసు అధికారి రాజేంద్రసింహ్ తెలిపారు. మిగిలిన ఆరుగురు కూడా సంక్షేమ ఆసుపత్రిలో మరణించారా లేదా ఇతర ఆసుపత్రులకు తరలించేటప్పుడు మృతి చెందారా అన్నది తెలియాల్సి వుంది.
COVID-19 నియమించబడిన ఆసుపత్రి అహ్మదాబాద్ నుండి 190 కిలోమీటర్ల దూరంలో ఉన్న భారుచ్-జంబుసర్ రహదారిపై ఉంది. అగ్ని ప్రమాదానికి కారణాలు ఏమిటో ఇంకా నిర్ధారించలేదని అధికారి తెలిపారు. గంటలోపు మంటలు అదుపులోకి వచ్చాయని, సుమారు 50 మంది రోగులను స్థానికులు, అగ్నిమాపక సిబ్బంది రక్షించారని అగ్నిమాపక అధికారి తెలిపారు. వారిని సమీపంలోని ఆసుపత్రులకు తరలించారు.
