ఎవర్నీ ఏమీ అనలేను.. ఇండస్ట్రీలో నిలబడాలంటే సక్సెస్ ఓ కొలబద్ద : దర్శకుడు వీరభద్రమ్
చేసింది రెండు సినిమాలైనా.. నాగార్జునతో 'భాయ్' వంటి చిత్రాన్ని చేసి అగ్ర దర్శకుడు కావాలనుకున్న వీరభద్రమ్కు.. ఆ చిత్రం దెబ్బకొట్టింది. ఈ విషయంలో ప్రయత్నలోపం జరిగిందని అంగీకరిస్తున్న ఆయన ఆ లోపాన్ని సరి
చేసింది రెండు సినిమాలైనా.. నాగార్జునతో 'భాయ్' వంటి చిత్రాన్ని చేసి అగ్ర దర్శకుడు కావాలనుకున్న వీరభద్రమ్కు.. ఆ చిత్రం దెబ్బకొట్టింది. ఈ విషయంలో ప్రయత్నలోపం జరిగిందని అంగీకరిస్తున్న ఆయన ఆ లోపాన్ని సరిచేసుకుని తీసిన చిత్రమే 'చుట్టాలబ్బాయి' అంటున్నాడు. 'అహనాపెళ్లంట', 'పూలరంగడు' వంటి హిట్ చిత్రాలను అందించి కింగ్ నాగార్జునతో 'భాయ్'వంటి యాక్షన్ చిత్రాన్ని రూపొందించిన వీరభద్రమ్ కొంత విరామం తర్వాత మరోసారి ప్రేక్షకుల ముందుకు వస్తున్నారు.
ఆది హీరోగా, నమితా ప్రమోద్ హీరోయిన్గా శ్రీ ఐశ్వర్యలక్ష్మి మూవీస్, ఎస్ఆర్టి ఎంటర్టైన్మెంట్స్ బ్యానర్స్పై వీరభద్రమ్ దర్శకత్వంలో వెంకట్ తలారి, రామ్ తాళ్లూరి నిర్మించిన ఔట్ అండ్ ఔట్ ఫ్యామిలీ ఎంటర్టైనర్ చిత్రం 'చుట్టాలబ్బాయి'. ఈ చిత్రం సెన్సార్ కార్యక్రమాలను పూర్తి చేసుకుని ఈనెల 19న వరల్డ్వైడ్గా రిలీజ్ కానుంది. ఈ సందర్భంగా చిత్ర దర్శకుడు వీరభద్రమ్తో ఇంటర్వ్యూ.
* 'భాయ్' తర్వాత గ్యాప్కు కారణం?
ఒక్కటే కారణం.. సక్సెస్ కాలేదు. ఇండస్ట్రీలో అదే కొలబద్ద.
* 'చుట్టాలబ్బాయి' చిత్రం ఎలా ఉండబోతుంది?
పూర్తి ఫ్యామిలీ ఎంటర్టైనర్ చిత్రం ఇది. 'అహనా పెళ్లంట', 'పూలరంగడు' చిత్రాలు ఎంటర్టైన్మెంట్తో ప్రేక్షకులను ఎలా అలరించాయో అదే కోవలో 'చుట్టాలబ్బాయి' చిత్రం కూడా అలరిస్తుంది. ప్రస్తుత సమాజంలో సగటు మనిషి తన జీవన గమనంలో ఎంతో స్ట్రెస్కి గురవుతున్నాడు. దాని నుండి విముక్తి కోసం మంచి సినిమాకి వెళ్లాలనుకుంటాడు. రెండున్నర గంటలు థియేటర్లో కూర్చుని హాయిగా నవ్వుకుని ఎంజాయ్ చేయాలనుకుంటాడు. అలా నవ్వుకుని ఎంజాయ్ చేసేవిధంగా మా చిత్రం ఉంటుంది.
* 'భాయ్' ఫలితం తర్వాత నాగార్జున రాంగ్స్టెప్ వేశానన్నారు. దీన్ని మీరెలా ఫీలయ్యారు?
ఎవర్నీ ఏమీ అనలేను. నేను 10 సంవత్సరాలు ఎంతో కష్టపడి నా గురువు ఇవివి సత్యనారాయణ గారి వద్ద వర్క్ నేర్చుకున్నాను. ఆయన బాటలోనే ప్రేక్షకులు ఎంజాయ్ చేసేవిధంగా సినిమాలు తీస్తున్నాను. కృష్ణవంశీ, తేజ, ఎంతో మంది దర్శకుల వద్ద అసిస్టెంట్ డైరెక్టర్గా, అసోసియేట్గా, కో డైరెక్టర్గా వర్క్చేశాను. 'అహనాపెళ్లంట'తో అనీల్ సుంకరగారు డైరెక్షన్ ఛాన్స్ ఇచ్చారు. 'పూలరంగడు'తో ఆర్ఆర్ వెంకట్ ఎంతో ఎంకరేజ్ చేసి ఆ సినిమా నిర్మించారు. అన్నపూర్ణ స్టూడియోస్ బ్యానర్లో నాగార్జున 'భాయ్' సినిమాకి ఆఫర్ ఇచ్చారు. ఇండస్ట్రీలో హిట్, ఫ్లాప్లు సహజం. 'భాయ్' కొంచెం నిరాశపరిచినా.. ఆ తప్పుని సరిదిద్దుకుని మంచి సినిమా తీయాలన్న కసితో 'చుట్టాలబ్బాయి' కథ రాసుకుని ఈ సినిమా తీశాను. సినిమా చూసే ప్రేక్షకులను ఎవరినీ ఈ సినిమా నిరాశపరచదు.
* వ్యక్తిగతంగా మీకు ఎలాంటి పేరు తెస్తుందని అనుకుంటున్నారు?
అహనాపెళ్లంట, పూలరంగడు నాకు ఎంత పేరు తెచ్చాయో అంతకన్నా ఎక్కువ పేరు 'చుట్టాలబ్బాయి'తో వస్తుందని గర్వంగా ఫీలవుతున్నాను. ఎంటర్టైన్మెంట్ చిత్రాలు వీరభద్రమ్ బాగా తీస్తాడని 'చుట్టాలబ్బాయి' చిత్రం మరోసారి ప్రూవ్ చేస్తుంది.
* ఆది క్యారెక్టర్ ఎలా ఉంటుంది?
రికవరీ బాబ్జీ క్యారెక్టర్లో ఆది ఎక్స్లెంట్గా నటించాడు. ఆది బాడీలాంగ్వేజ్, కాస్ట్యూమ్స్, లుక్స్, హెయిర్ స్టైల్ అన్నీ చాలా కొత్తగా ఉంటాయి. డైలాగ్ డెలివరీ కూడా చాలా మెచ్యూర్డ్గా ఉంటుంది. నేను రాసుకున్న కథకి హండ్రెడ్ పర్సెంట్ ఆది న్యాయం చేశాడు.
* ఆదికి సక్సెస్లు లేవుకదా.. ఆయనకెలా ఉపయోగపడుతుంది?
ప్రేమకావాలి, లవ్లీ సినిమాలు హిట్ అయి ఆదికి ఎంత పేరు తెచ్చాయో అందరికీ తెలుసు. ఆది కెరీర్లో హై బడ్జెట్ ఫిలిం ఇది. కమర్షియల్ ఎలిమెంట్స్తో రూపొందించిన ఈ చిత్రం ఆది కెరీర్లో ది బెస్ట్ ఫిలిం అవుతుంది.
* ఎంటర్టైన్మెంట్ ఎంతవరకు ఉంటుంది?
బ్రహ్మానందం, పోసాని కృష్ణమురళి, రఘుబాబు, కృష్ణభగవాన్ల కాంబినేషన్లో వచ్చే సీన్స్ ప్రేక్షకులను కడుపుబ్బ నవ్విస్తాయి. ముఖ్యంగా పృధ్వీ పూర్తి స్థాయిలో నవ్విస్తాడు. అతని క్యారెక్టర్ సినిమాలో వన్ ఆఫ్ ది హైలైట్గా నిలుస్తుంది. స్టార్టింగ్ నుండి ఎండింగ్ వరకు ఎంజాయ్ చేసేలా ఈ చిత్రం
ఉంటుంది.
* ఎవరికి 'చుట్టాలబ్బాయి'?
చిత్రంలో పోసానికి చుట్టాలబ్బాయి. రిలీజ్ అయ్యాక ప్రేక్షకులకూ చుట్టాలబ్బాయ్ అవుతాడు. సరదా సరదాగా జాలీగా తిరిగే ఓ కుర్రాడు అనుకోకుండా ఓ ప్రాబ్లమ్లో ఇరుక్కుంటాడు. దాని నుంచి ఆ కుర్రాడు ఎలా బయటపడ్డాడు అనేది ముఖ్య కథాంశం. ఈ సినిమాలో ప్రతి క్యారెక్టర్ చాలా కొత్తగా, ఫ్రెష్గా ఉంటుంది.
* మార్కెట్లేని ఆదికి రెండకెల బడ్జెట్తో తీయడం కరెక్టేనా?
ఈ కథను అనుకున్నప్పుడు ఆది మార్కెట్ బాగుంది. ఆ తర్వాతే ఒక సినిమా ఫెయిల్ అయింది. అయినా కథ డిమాండ్ మేరకు క్వాలిటీ విషయంలో ఎక్కడా కాంప్రమైజ్ కాకుండా ఈ చిత్రాన్ని నిర్మించారు మా నిర్మాతలు. బ్యాంకాక్, రాజమండ్రి, హైదరాబాద్ తదితర లొకేషన్స్లో షూట్చేశాం. కొత్త నిర్మాతలైనా ప్యాషన్తో మంచి సినిమాలు తీయాలని ఇండస్ట్రీకి వచ్చారు. ఫస్ట్ సినిమా కాబట్టి చాలా రిచ్గా ఈ చిత్రాన్ని నిర్మించారు. అవుట్పుట్ చూసుకున్నాక వెంకట్, రామ్ చాలా హ్యాపీగా వున్నారు.
* సాయికుమార్ క్యారెక్టర్ ఎలా ఉంటుంది?
ఈ సినిమాలో ఒక కీ రోల్ ఉంది. అది సాయికుమార్ చేస్తాను అని చెప్పారు. వెంటనే మీరు చేస్తే అదిరిపోతుంది సార్ అని చెప్పాను. ఆది, సాయికుమార్ కాంబినేషన్లో చేసిన సీన్స్ చాలా పవర్ఫుల్గా వుంటాయి. విలేజ్ నేటివిటీ ఉన్న ఒక పెద్దాయన క్యారెక్టర్లో సాయికుమార్ అత్యద్భుతంగా చేశారు. పెద్ద పెద్ద రైతులందరికీ సాయికుమార్ క్యారెక్టర్ కనెక్ట్ అవుతుంది. హండ్రెడ్ పర్సెంట్ సాయికుమార్ ఈ క్యారెక్టర్కి యాప్ట్ అయ్యారు. సినిమా చూసిన ప్రతి ఒక్కరూ సాయికుమార్ భలే చేశాడ్రా అని అప్రీషియేట్ చేస్తారు.
* నిర్మాతలకు ఈ చిత్రం లాభిస్తుందా?
హీరో ఆది మార్కెట్ రేంజ్కన్నా ఎక్కువ ఖర్చుపెట్టి చాలా గ్రాండియర్గా ఈ సినిమా నిర్మించారు. ఫస్ట్ నుండి ఈ సినిమాపై పాజిటివ్ వైబ్రేషన్స్ స్టార్ట్ అయ్యాయి. ఫస్ట్ టీజర్ రిలీజ్ అయ్యాక సినిమాపై క్రేజ్ బాగా పెరిగింది. ఆడియో రిలీజ్ అయి చాలా పెద్ద హిట్ అయింది. మూడు పాటలు కాలర్ ట్యూన్స్గా పెట్టుకుంటున్నారు. ట్రైలర్కి యుట్యూబ్లో పది లక్షల వ్యూస్ వచ్చాయి. ఒక్కొక్క ఏరియా నుండి ఇద్దరు, ముగ్గురు డిస్ట్రిబ్యూటర్స్ వచ్చి ఫ్యాన్సీ రేటుతో సినిమాని కొన్నారు. నిర్మాతలు చాలా కాన్ఫిడెంట్గా, హ్యాపీగా ఉన్నారు.
* సినిమాలో మెయిన్ హైలైట్స్ ఏంటి?
తమన్ మ్యూజిక్తో పాటు రీ రికార్డింగ్ ఇరగదీశాడు. కెమెరామెన్ అరుణ్ ప్రతి సీన్ని విజువల్గా వండర్ఫుల్గా చిత్రీకరించాడు. రామ్, వెంకట్ మేకింగ్, ఆది - సాయికుమార్ల పర్ఫామెన్స్, పృధ్వీ కామెడీ సినిమాకి ప్లస్ పాయింట్స్గా నిలుస్తాయి. 10 సంవత్సరాలపాటు గుర్తు పెట్టుకునే విధంగా మా 'చుట్టాలబ్బాయి' చిత్రం ఉంటుంది. మంచి సినిమా చూశాం అనే ఫీలింగ్తో ఆడియన్స్ థియేటర్ నుండి బయటికి వస్తారు.
* తదుపరి చిత్రాలు?
రెండు ప్రాజెక్ట్స్ కమిట్ అయ్యాను. ఇదే బ్యానర్లో ఒకటి, బయటి బ్యానర్లో ఒక సినిమా ఉంటుంది. వివరాలు త్వరలో చెబుతాను అన్నారు.
