తాలిబన్ తీవ్రవాదులు అనుకున్నంతపని చేశాయి. ఆప్ఘనిస్థాన్ దేశాన్ని కైవసం చేసుకున్నాయి. ఈ దేశం నుంచి అమెరికా సారథ్యంలోని సంకీర్ణ బలగాలను ఉపసంహరించుకున్న తర్వాత తాలిబన్ తీవ్రవాదులకు పట్టుదొరికింది. ఒక్కో నగరాన్ని ఆక్రమించుకుంటూ వచ్చిన తాలిబన్ తీవ్రవాదు.. ఆదివారం ఆ దేశ రాజధాని కాబూల్ నగరాన్ని కూడా తమ ఆధీనంలోకి తెచ్చుకున్నారు. దీంతో ఆ దేశ అధ్యక్షుడు అష్రాఫ్ ఘనీ తన పదవికి రాజీనామా చేశారు. అంతేకాదు తాలిబన్లు శాంతియుతంగా అధికారాన్ని హస్తగతం చేసుకోవడం కోసం దేశ అధ్యక్షుడి బంగ్లాదేశ్‌కు బయల్దేరారు. ఈ విషయాన్ని ఒక ఆంగ్ల వార్తా సంస్థ ధ్రువీకరించింది.
మరోవైపు, తాలిబన్లకు అధికారాన్ని అప్పగించడంపై ఆఫ్ఘనిస్థాన్ ప్రెసిడెన్షియల్ ప్యాలెస్‌లో చర్చలు జరుగుతున్నట్లు అంతర్జాతీయ మీడియా తెలిపింది. నూతన తాత్కాలిక ప్రభుత్వానికి చీఫ్‌గా అలీ అహ్మద్ జలాలీని నియమించబోతున్నట్లు వార్తలు వస్తున్నాయి. ఈ ప్రక్రియకు మధ్యవర్తిగా అత్యున్నత స్థాయి జాతీయ సయోధ్య మండలి చీఫ్ అబ్దుల్లా అబ్దుల్లా వ్యవహరిస్తున్నారు.
అంతకుముందు తాలిబన్లు ఓ ప్రకటనలో కాబూల్ ప్రజలకు హామీ ఇచ్చారు. సాధారణ ప్రజలు భయపడవలసిన అవసరం లేదని భరోసా ఇచ్చారు. తాము కాబూల్‌లోకి సైనికపరంగా ప్రవేశించబోమని తెలిపారు. తాము శాంతియుతంగానే కాబూల్‌లోకి ప్రవేశించినట్టు వెల్లడించారు.
