అమెరికా మాజీ అధ్యక్షుడు బరాక్ ఒబామా, ఆ దేశ మాజీ విదేశాంగ మంత్రి హిల్లరీ క్లింటన్ హత్యకు కుట్ర పన్నారా? వారిద్దరి నివాసాలకు భారీ మొత్తంలో పేలుడు పదార్థాలతో కూడిన పార్శిల్స్ పంపారు. ఈ విషయం ఆ దేశ నిఘా వర్గాలు వెల్లడించాయి.
రెండు రోజుల కిందట న్యూయార్క్ నగర శివారుల్లో ఫిలాంత్రోఫిస్ట్ జార్జ్ సోరోస్ ఇంటి వద్ద బాంబు దొరికిన నేపథ్యంలో తాజా పార్సిల్ ఘటన వెలుగులోకి వచ్చింది. అమెరికా 'మాజీ'లకు పంపిన పార్శిళ్లను తనిఖీ చేసినపుడు అనుమానిత పదార్థాలు గుర్తించారు. అయితే ఈ అనుమానిత పార్శిళ్లు ఎక్కడి నుంచి వచ్చాయన్నది ఇంకా తెలియలేదు.
ఈ పేలుడు పదార్థం గురించి తెలియగానే న్యూయార్క్‌లోని పలు కార్యాలయాలను ఖాళీ చేయించారు. ఫైర్ అలారం మోగించినట్టు ఆ దేశ మీడియా వర్గాలు పేర్కొన్నారు. అమెరికా నిఘా, రహస్య విభాగం చేసిన ప్రకటన మేరకు ఈ నెల 23వ తేదీన సాయంత్రం హిల్లరీకి పంపిన పార్శిల్‌ను మొదట గుర్తించారు.
బుధవారం తెల్లవారుజామున ఒబామాకు పంపిన పార్శిల్ వెలుగులోకి వచ్చింది. ఈ పార్శిళ్లలో పేలేందుకు అవకాశమున్న పరికరాలను గుర్తించామని సీక్రెట్ సర్వీస్ అధికారులు చెప్పారు. ఎఫ్‌బీఐ అధికారులు మాట్లాడుతూ తమకూ ఈ అనుమానిత పార్శిళ్ల సమాచారం అందిందని.. దర్యాప్తు అధికారులకు తాము సహకారం అందిస్తున్నామని చెప్పారు. అయితే దీనిపై మాట్లాడేందుకు ఒబామా అధికార ప్రతినిధి నిరాకరించారు.
