బ్రిటన్ యువరాజు హ్యారీ కీలక నిర్ణయం తీసుకున్నారు. తన సంతానం రాచబిడ్డలా పెరగకూడదన్నారు. అందుకే, కుటుంబానికి దూరంగా వచ్చేసినట్టు చెప్పారు. ముఖ్యంగా, తనను పెంచేందుకు తన తండ్రి ఎన్నో కష్టాలు పడ్డారన్నారు. ఆ కష్టాలు తనతో పాటు.. తన బిడ్డలు పడకూడదనే బాధలు, బంధనాల నుంచి విముక్తి పొందేందుకే కుటుంబం అనే సంకెళ్లు తెంచుకుని అమెరికాకు వెళ్లామన్నారు. తన తండ్రి ప్రిన్స్ చార్లెస్ పడిన బాధలే తానూ పడ్డానని చెప్పుకొచ్చారు.
గురువారం ‘ఆర్మ్ చెయిర్ ఎక్స్‌పర్ట్’ పాడ్ క్యాస్ట్ ఇంటర్వ్యూలో ఆయన తన వ్యక్తిగత జీవితంలోని పలు విషయాలను పంచుకున్నారు. తాను తీసుకున్న నిర్ణయం విషయంలో తన తండ్రిని నిందించదలచుకోలేదని హ్యారీ చెప్పారు. అయితే, తన పిల్లల విషయంలో మాత్రం తన తండ్రి చేసిన తప్పే చేయకూడదనే ఈ నిర్ణయం తీసుకున్నానని వివరించారు.
తన పిల్లల పెంపకం విషయంలో తాను చాలా ఆవేదనకు గురయ్యానన్నారు. రాజకుటుంబంలో ఇలాంటి బాధలే తన తల్లిదండ్రులూ పడి ఉండొచ్చన్నారు. కాబట్టి ఆ బాధల బంధనాలను తెంచుకోవాలన్న నిర్ణయానికి వచ్చానని తెలిపారు.
తమ పెంపకం విషయంలో తన తండ్రి ఎన్ని కష్టాలు పడ్డాడో, రాచబిడ్డల్లా తమను పెంచేందుకు ఎంత ఆవేదన అనుభవించారో ఇప్పుడు అర్థమవుతోందని చెప్పారు. ఇలాంటి పెంపకాన్ని తన పిల్లలకు ఇవ్వకూడదన్న ఉద్దేశంతోనే భార్యాపిల్లలతో అమెరికాకు వచ్చేశానని ఆయన వివరించారు. ప్రస్తుతం మేఘన్‌తో కలిసి ఆయన లాస్ఏంజిలిస్‌కు సమీపంలోని మోంటేసిటోలో ప్రిన్స్ హ్యారీ దంపతులు నివసిస్తున్నారు.
