అమెరికా అధ్యక్షుడు డోనాల్డ్ ట్రంప్‌కు హ్యూస్టన్ నగర పోలీసు చీఫ్ ఆర్ట్ అసేవెడో గట్టి వార్నింగ్ ఇచ్చారు. అమెరికా దేశంలో జార్జ్ ఫ్లాయిడ్ అనే నల్లజాతీయుడిని మిన్నియా పోలీస్ అధికారి ఒకరు ఉద్దేశ్యపూర్వకంగా హత్య చేశాడు. దీంతో దేశంలో అల్లర్లు చెలరేగాయి. వీటిని అణిచివేసేందుకు సైన్యాన్ని దించుతానంటూ అమెరికా ప్రెసిడెంట్ డోనాల్డ్ ట్రంప్ హెచ్చరికలు జారీచేశారు. వీటిపై హ్యూస్టన్ నగర పోలీస్ చీఫ్ అసేవెడో హెచ్చరించారు.
ట్రంప్ నోరు మూసుకోవాలంటూ సూచన చేశారు. ఇలాంటి వ్యాఖ్యల వల్ల నిరసనకారుల ఆగ్రహం ఇంకా పెరుగుతుందని, ఇలా వ్యాఖ్యలు చేయడం వారిని రెచ్చగొట్టడమే అవుతుందన్నారు. నిరసనకారులను రెచ్చగొట్టకుండా ట్రంప్ నోరు మూసుకొని ఉంటే పదివేలని సూచించారు. ఇలా నోటికొచ్చినట్లు మాట్లాడటానికి బదులుగా ఏదైనా నిర్మాణాత్మక కార్యక్రమం ప్రకటిస్తే బాగుంటుందని చెప్పారు. ఈ సందర్భంగా ఫారెస్ట్‌ గంప్‌ సినిమాలోని 'మీకు చెప్పడానికి ఏమీ లేకపోతే.. చెప్పకండి' అనే డైలాగ్‌ను అసేవెడో ఉటంకించారు.
ఇదిలావుంటే, సోమవారం వివిధ రాష్ట్రాల గవర్నర్లతో వీడియో కాన్ఫరెన్స్‌లో మాట్లాడిన ట్రంప్.. అక్కడ కూడా ఇదే మాదిరి వ్యాఖ్యలు చేశారు. 'మీరు చాలా బలహీనంగా ఉన్నారు.. నిరసనకారులపై పైచేయి అనిపించుకోండి.. లేకపోతే ఇదంతా సమయం వృథా చేయడమే.. మీరిలాగే ఉంటే వారు మీపైకెక్కి నాట్యం చేస్తారు' అని వ్యంగ్యంగా వ్యాఖ్యానించడం పట్ల పలువురు అభ్యంతరం వ్యక్తంచేస్తున్నారు.
