అమెరికాలో ఓ నల్ల జాతీయుడుని పోలీసు అధికారి ఒకరు ఉద్దేశ్యపూర్వకంగా హత్య చేశాడు. దీంతో అతనిపై హత్య కేసు నమోదైంది. అలాగే, మరో ముగ్గురు పోలీసులపై కూడా వేటుపడింది. ఈ హత్య కేసు అమెరికాలోనే కాకుండా, సోషల్ మీడియాలో సైతం సంచలనం సృష్టించింది.
అమెరికాలోని మిన్నియా పోలీసులు జార్జ్ ఫ్లాయిడ్ అనే నల్ల జాతీయుడిని ఓ కేసులో పట్టుకున్నారు. ఆ తర్వాత 43 యేళ్ళ ఫ్లాయిడ్‌ను నేలపై పడేసి అతని గొంతుపై ఓ పోలీసు అధికారి తన మోకాలుతో నొక్కిపట్టాడు.
దీంతో ఫ్లాయిడ్‌కు ఊపిరి ఆడలేదు. తనకు ఊపిరాడటం లేదంటూ పలుమార్లు ప్రాధేయపడినా ఆ అధికారి వదిలిపెట్టలేదు. ఇదే అమయంలో ఫ్లాయిడ్‌కు గుండెపోటు రావడంతో ప్రాణాలు కోల్పోయాడు.
ఫ్లాయిడ్ మృతదేహాన్ని పోస్టుమార్టం నిర్వహించగా, న‌ల్ల‌జాతీయుడికి గుండెపోటు వ‌చ్చిన‌ట్లు హెన్నెపిన్ కౌంటీ మెడిక‌ల్ ఆఫీస‌ర్ తన పోస్టుమార్ట‌మ్‌లో పేర్కొన్నారు. మెడ‌ను వ‌త్తిపెట్ట‌డం వ‌ల్ల ఫ్లాయిడ్ మ‌ర‌ణించిన‌ట్లు పోస్టుమార్ట‌మ్‌లో తేల్చారు.
ఈ కేసులు పోలీసు ఆఫీస‌ర్ డెరెక్ చౌవిన్‌పై హత్య కేసు న‌మోదు అయ్యింది. వ‌చ్చే వారం అత‌న్ని కోర్టులో ప్ర‌వేశ‌పెట్ట‌నున్నారు. ఇదే ఘ‌ట‌న‌లో మరో ముగ్గురు పోలీసులపై వేటు వేశారు.
