అమెరికా మాజీ అధ్యక్షుడు డోనాల్డ్ ట్రంప్ నివాసంలో ఆ దేశ అత్యున్నత స్థాయి దర్యాప్తు సంస్థ ఎఫ్.బి.ఐ సోదాలు నిర్వహించింది. సోమవారం అర్థరాత్రి (భారత కాలమానం ప్రకారం మంగళవారం తెల్లవారుజామున) ఈ సోదాలు జరిగాయి.
ట్రంప్‌కు చెందిన విలాసవంతమైన ఫామ్ హౌస్, రిసార్ట్ మార్-ఎ-లిగోలో సోదాలు నిర్వహించింది. దర్యాప్తు ఏజెన్సీ ఏజెంట్లు ట్రంప్ ఇంటిని చుట్టుముట్టగా తనిఖీలు కొనసాగుతున్నాయి. అయితే, ఈ సోదాలపై ఎఫ్‌బీఐ దీనిపై ఎలాంటి సమాచారం వెల్లడించలేదు.
మరోవైపు, ఈ సోదాలపై డోనాల్డ్ ట్రంప్ స్పందించారు. మార్-ఎ-లెగోలోని పామ్ బీచ్‌లోని తన అందమైన నివాసాన్ని ఎఫ్‌బీఐ స్వాధీనం చేసుకుందన్న ట్రంప్.. ఇందుకు కారణాలు మాత్రం తెలుపలేదు. దీనిపై, ఎఫ్‌బీఐ ప్రతినిధిని సంప్రదించగా.. సమాధానం చెప్పేందుకు నిరాకరించారు.
అయితే, ఎఫ్‌బీఐ చర్య రాజకీయ ప్రతీకారమేనని ట్రంప్ ఆరోపించారు. మాజీ అధ్యక్షుడి ఇంటిపై దర్యాప్తు సంస్థ దాడి చేయడం అమెరికాకు ఇది గడ్డు కాలమని వ్యాఖ్యానించారు. అమెరికాలో ఇంతకు ముందు ఏ మాజీ అధ్యక్షుడికి ఇలాంటి పరిస్థితి ఎదురుకాలేదని ఆయన గుర్తుచేశారు.
