కొంతమందిలో అరుదైన జన్యు లక్షణాలు కనిపిస్తుంటాయి. అలాంటివాటిలో హచిసన్-గిల్ ఫోర్డ్ ప్రొగేరియా సిండ్రోమ్ ఒకటి. రెండు కోట్లమందిలో ఏ ఒక్కరిలోనో కనిపించే జన్యు సంబంధ లోపం. ఈ సిండ్రోమ్‌తో బాధపడేవారు వయసుకు మించి పెద్దవారిలా కనిపిస్తారు. యుక్త వయసులోనే వృద్ధాప్యం వచ్చేస్తుంది.
తాజాగా బ్రిటన్ దేశానికి చెందిన అషాంటీ స్మిత్ అనే అమ్మాయి కూడా ఈ హచిసన్-గిల్ ఫోర్డ్ ప్రొగేరియా సిండ్రోమ్‌తో బాధపడుతూ ఈ లోకాన్ని విడిచింది. అషాంటీ 8వ ఏట ఈ సిండ్రోమ్‌తో బాధపడుతున్నట్టు వైద్యులు గుర్తించారు. దీంతో ఆమెలో యేడాదికి 8 రెట్లు వయసు మళ్లిన లక్షణాలు కనిపించేవి.
ఈ సిండ్రోమ్ కారణంగా ఆ యువతి 18 ఏళ్ల వయసులో అందరినీ విషాదంలో ముంచెత్తుతూ కన్నుమూసింది. అప్పటికే తీవ్ర వృద్ధాప్య లక్షణాలు ఆమెను చుట్టుముట్టాయి. కాగా, తాను చనిపోయేంత వరకు తనలోని విషాదాన్ని మౌనంగా భరిస్తూ, అందరినీ నవ్వించేది.
