బాయ్ ఫ్రెండ్ పై కోపంతో విమానం కిటికీ పగలగొట్టేసిందో అమ్మడు. ఆమె చేష్టలతో అసలుకే ఎసరు వచ్చేలా వుండడంతో పైలట్ విమానాన్ని అత్యవసరంగా దించాల్సి వచ్చింది.
గత నెలలో చైనాలో జరిగిన ఈ ఘటనకు సంబంధించిన వీడియో సోషల్‌మీడియాలో వైరల్‌కావడంతో వెలుగులోకి వచ్చింది. లూంగ్‌ ఎయిర్‌లైన్స్‌కి చెందిన దేశీయ విమానంలో మే 25న ఈ ఘటన జరిగింది.
విమాన సిబ్బంది, ప్రయాణికులు వారిస్తున్న వినకుండా లీ (29) అనే యువతి పదేపదే కిటికీ అద్దాన్ని పగలగొట్టేందుకు యత్నిస్తున్న దృశ్యాలు సిసిటివి కెమెరాలో రికార్డయ్యాయి.
ఈ విషయం పైలెట్‌కు తెలియడంతో సెంట్రల్‌ చైనా ప్రావిన్స్‌లోని జిన్‌బెంగ్‌ అంతర్జాతీయ విమానాశ్రయంలో అత్యవసరంగా ల్యాండింగ్‌ చేశారు. అనంతరం సిబ్బంది సమాచారంతో అక్కడికి చేరుకున్న అధికారులు ఆమెను పోలీసులకు అప్పగించారు.
తన బాయ్ ఫ్రెండ్ మీద ఉన్న కోపంతోనే కిటికీ అద్దాన్ని పగుల కొట్టేందుకు యత్నించినట్లు ఆమె తెలిపింది. అయితే తోటి ప్రయాణికుల ప్రాణాలకు ప్రమాదం కలిగేలా వ్యవహరించడంతో అమెపై కేసు నమోదు చేసినట్లు అధికారులు తెలిపారు.
