కాఫీయే కదా తాగితే ఏమవుతుందిలే అనుకుంటే మాత్రం మీకు ఊబకాయం తప్పదని వైద్యులు అంటున్నారు. కాఫీతో కొన్ని రకాలైన ప్రయోజనాలున్నా కూడా, అతి కాఫీ శరీర బరువు పెరగడానికి కారణం అవుతుందని తాజా అధ్యయనం తేల్చింది. కాఫీ సేవనం వల్ల కేవలం ఊబకాయమే కాకుండా కొన్ని రకాలైన మొండి వ్యాధులు కూడా వచ్చే ప్రమాదముందని వెస్టరన్‌ ఆస్ట్రేలియా విశ్వవిద్యాలయానికి చెందిన పరిశోధకులు నిర్వహించిన అధ్యయనంలో తెలియవచ్చింది.
కాఫీని పరిమితంగా తీసుకోవాలని, అపరిమితంగా తీసుకుంటే ఇలాంటి సమస్యలు వస్తాయని పరిశోధకులు హెచ్చరిస్తున్నారు. కొందరు తాము కెఫీన్‌ రహితమైన కాఫీ తాగుతున్నాం కదా అని అనుకుంటారని, అలాంటి వాళ్లు కూడా జాగ్రత్తగా ఉండాలని శాస్త్రవేత్తలు చెబుతున్నారు.
రోజుకు ఐదారు కప్పుల కాఫీని తాగేవారి ఉదరభాగంలో కొవ్వు పేరుకుపోయినట్లు తమ అధ్యయనంలో తేలిందని వారు తెలిపారు. కాఫీలో ఉండే క్లోరోజెనిక్‌ యాసిడ్‌ (సీజీఏ) కి మధుమేహాన్ని నివారించే లక్షణాలున్నాయని, అయితే దీని మోతాదు మితిమీరితే మాత్రం కొవ్వు పేరుకునే సమస్య ఉత్పన్నమవుతోందని శాస్త్రవేత్తలు హెచ్చరిస్తున్నారు. కాబట్టి కాఫీ వల్ల మేలున్నా... అతిగా సేవించడం మాత్రం ప్రమాదమే.
