"టెలిస్కోప్" వయసెంత..?

File FILE

పిల్లలూ... విశ్వ రహస్యాలను కనుక్కోవడంలో కీలకపాత్ర పోషించిన టెలిస్కోప్ వయసెంతో మీకు తెలుసా..? సెప్టెంబర్ 25, 2008 నాటికి ఈ టెలిస్కోప్‌కు 400 సంవత్సరాలు నిండాయి. అసలు ఈ టెలిస్కోప్‌ను ఎవరు రూపొందించారు? తదితర విషయాలను ఇప్పుడు మనం తెలుసుకుందాం...!

మొట్టమొదటిసారిగా నెదర్లాండ్ దేశానికి చెందిన హాన్స్ లిప్పర్షీ 1608వ సంవత్సరంలో రెండు కటకాల సాయంతో టెలిస్కోప్‌ను రూపొందించారు. ఆ తరువాత 17వ శతాబ్దంలో గెలీలియో గెలీలి టెలిస్కోప్‌ను అంతరిక్ష పరిశోధనలకు ఉపయోగించాడు. ఇక అప్పట్నించే టెలిస్కోప్‌కు విస్తృత ప్రాధాన్య లభించగా, ఆపై కొంతకాలానికే మనదేశంలోకి కూడా అడుగుపెట్టింది.

మొఘల్ సామ్రజ్యాధిపతి జహంగీర్‌కు ఓ ఆంగ్లేయ అధికారి టెలిస్కోప్‌ను బహుమతిగా ఇచ్చాడు. గూఢచర్యానికి ఉపయోగించే పరికరంగా అప్పట్లో దాన్ని భావించేవారు. అయితే దీని వినియోగంపై జహంగీర్ ఆసక్తి కనబరచకపోవడంతో అది అలంకార వస్తువుగానే మిగిలిపోయింది.

ఆ తరువాత 1786లో ఈస్టిండియా కంపెనీ తరపున భారత్‌కు వచ్చిన ఆంగ్లేయ అధికారి విలియం ఫ్రైస్ తన సొంత ఖర్చులతో తమిళనాడులోని, చెన్నై నగరంలో ఓ అంతరిక్ష పరిశోధనాశాలను ఏర్పాటు చేశారు. క్రమంగా ఈస్టిండియా కంపెనీ ఈ పరిశోధనా శాల బాధ్యతలను స్వీకరించి, పూర్తిస్థాయిలో వసతులు కల్పించింది.