కరోనా వైరస్ దెబ్బకు ప్రపంచ దేశాలు వణికిపోతున్నాయి. ఈ మహమ్మారి వైరస్ సోకకుండా ఉండేందుకు అనేక అంతర్జాతీయ ఈవెంట్స్ వాయిదా వేస్తున్నారు. టోక్యో వేదికగా జరగాల్సిన ఒలింపిక్స్ పోటీలను సైతం వాయిదా వేసి, వచ్చే యేడాది నిర్వహించేలా షెడ్యూల్ ప్రకటించారు. అలాగే, అనేక క్రికెట్ సిరీస్‌లు వాయిదాపడుతున్నాయి.
అలాగే, అనేక మంది క్రికెటర్ల వివాహాలు కూడా వాయిదాపడ్డాయి. అలా ఆస్ట్రేలియాకు చెందిన మొత్తం ఎనిమిది మంది క్రికెటర్ల వివాహాలు వాయిదాపడ్డాయి. దీనికి కారణం కరోనా వైరస్ కారణంగా ఆస్ట్రేలియాలో సంపూర్ణ లాక్‌డౌన్ అమలువుతోంది. దీంతో ఎనిమిది మంది క్రికెటర్లు తమ పెళ్ళిళ్లను వాయిదావేసుకున్నారు.
ఆస్ట్రేలియా మీడియా కథనాల మేరకు.. క్రికెట్ ఆస్ట్రేలియాకు చెందిన డి'ఆర్సీ షార్ట్, పేసర్ జాక్సన్ బర్డ్, లెగ్ స్పిన్నర్ ఆడమ్ జాంపా, అన్‌కాప్డ్ మిచెల్ స్వెప్సన్, ఆండ్రూ టై, జెస్ జోనాసెన్, అలిస్టర్ మెక్‌డెర్మాట్ మరియు కాట్లిన్ ఫ్రైట్‌లు ఈ నెలలో తమ వివాహాలు చేసుకోవాలని భావించారు. అందుకు తగిన ఏర్పాట్లు కూడా చేసుకున్నారు.
కానీ, కరోనా వైరస్ ప్రపంచాన్ని కబళించింది. దీంతో అనేక ప్రపంచ దేశాల్లో లాక్‌డౌన్లు అమలు చేస్తున్నారు. ఈ కారణంగా వీరు తమ వివాహాలను నిలిపివేయక తప్పని పరిస్థితి ఏర్పడింది. తదుపరి ఎప్పుడు అన్నదానిపై కూడా స్పష్టత లేదు.
