వచ్చే నెల ఐదో తేదీ నుంచి ఐసీసీ ప్రపంచ కప్ క్రికెట్ పోటీలు భారత్ వేదికగా జరుగున్నాయి. ఈ టోర్నీ కోసం అన్ని రకాల ఏర్పాట్లు పూర్తి చేశారు. అయితే, టోర్నీకి ముందు ఆయా జట్లు సన్నాహక మ్యాచ్‌లను ఆడునున్నాయి. ఇందులో భాగంగా, ఈ నెల 29వ తేదీన హైదరాబాద్ నగరంలోని ఉప్పల్ స్టేడియంలో పాకిస్థాన్, న్యూజిలాండ్ జట్ల మధ్య వార్మప్ మ్యాచ్ జరుగనుంది.
అయితే, ఈ ప్రాక్టీసు మ్యాచ్‌పై పోలీసులు కొన్ని ప్రతిపాదనలు చేశారు. ఈ నెల 28, 29 తేదీల్లో నగరంలో గణేశ్ నిమజ్జనం ఉండడంతో, ఆ దిశగా మరింత భద్రతను అందించాల్సి ఉందని పోలీసులు స్పష్టం చేశారు. స్టేడియంలోకి ప్రేక్షకులను అనుమతించేట్టయితే అత్యధిక సంఖ్యలో పోలీసులతో భద్రత అందించాల్సి ఉంటుందని, గణేశ్ నిమజ్జనం నేపథ్యంలో తాము పెద్ద సంఖ్యలో పోలీసులతో భద్రత కల్పించలేమని తేల్చి చెప్పారు.
దీంతో పాక్-కివీస్ వార్మప్ మ్యాచ్‌ను ప్రేక్షకులు లేకుండానే జరుపుకోవాలని హైదరాబాద్ క్రికెట్ సంఘం (హెచ్ సీఏ) పెద్దలకు పోలీసులు వివరించారు. పోలీసుల సూచనలను హెచ్‌సీఏ పాటించే అవకాశాలున్నట్టు తెలుస్తోంది. ఇప్పటికే ఈ మ్యాచ్ కోసం 1,500 టికెట్లు విక్రయించినప్పటికీ, ప్రేక్షకులు లేకుండా మ్యాచ్ జరపడానికే హెచ్‌సీఐ మొగ్గు చూపుతున్నట్టు తెలుస్తోంది.
