హైదరాబాదీ స్టార్ క్రికెట్ అంబటి రాయుడు తండ్రి అయ్యాడు. ఆయన సతీమణి చెన్నుపల్లి విద్య ఆదివారం పండంటి పాపకు జన్మనిచ్చారు. ప్రస్తుతం ఐపీఎల్‌లో అంబటి రాయుడు చెన్నై సూపర్‌ కింగ్స్‌ జట్టుకు ప్రాతినిథ్యం వహిస్తున్న సంగతి తెలిసిందే. ఈ నేపథ్యంలో అంబటి రాయుడు తండ్రి అయ్యాడనే విషయాన్ని సీఎస్కే ట్విట్టర్‌ వేదికగా అభిమానులకు తెలియజేసింది.
చిన్నారి, విద్యలతో కలిసి రాయుడు దిగిన ఫొటోను కూడా షేర్‌ చేసింది. దీంతో పలువురు ప్రముఖులు, అభిమానులు రాయుడుకు శుభాకాంక్షలు తెలియజేస్తున్నారు. సీఎస్కే ఆటగాడు సురేష్‌ రైనా కూడా రాయుడుకు శుభాకాంక్షలు తెలియజేశారు.
పండంటి పాపకు జన్మనిచ్చిన రాయుడు, విద్య దంపతులకు హృదయపూర్వక శుభాకాంక్షలంటూ అభినందించాడు. చిన్నారితో గడిపే ప్రతి ఒక్క క్షణాన్ని ఆనందించండి. మీరు ఎప్పుడూ ప్రేమ, ఆనందంతో ఉండాలని కోరుకుంటున్నానని చెప్పాడు.
ఇకపోతే.. భారత క్రికెటర్ అంబటి రాయుడు గురించి అందరికి తెలుసు. అయితే గత సంవత్సర కాలంగా రాయుడు కెరీర్‌ కష్టాలో ఉంది. ఇలాంటి పరిస్థితుల్లో పెళ్ళైన 11 ఏళ్ల తర్వాత అంబటి రాయుడు తండ్రి అయ్యాడు. 2009లో చెన్నుపల్లి విద్యను ప్రేమించి పెళ్లి చేసుకున్నాడు అంబటి రాయుడు. ఇక ఆదివారం విద్య ఓ పాపకు జన్మనిచ్చింది.
ఇక రాయుడు 2018 నుండి ఐపీఎల్‌లో సీఎస్కే తరపున ఆడుతున్నాడు. అయితే గత ఏడాది జరిగిన ప్రపంచ కప్ కోసం తనను ఎంపిక చేయకపోవడంతో నిరాశకు గురైన రాయుడు రిటైర్మెంట్‌ ప్రకటించాడు. కానీ తర్వాత దానిని వెనక్కి తీసుకున్నాడు.
