కరోనా నుంచి కోలుకుంటున్న వారికి ఫంగస్ కాటు తప్పట్లేదు. ఇప్పటికే బ్లాక్ ఫంగస్, వైట్ ఫంగస్, ఎల్లో ఫంగస్‌లు బయటపడుతున్నాయి. తాజాగా గ్రీన్ ఫంగస్ కలకలం రేపుతోంది. వివరాల్లోకి వెళితే.. మధ్యప్రదేశ్ లోని ఇండోర్ నగరంలో 34 ఏళ్ల ఓ వ్యక్తిలో ఈ ఫంగస్‌ను గుర్తించారు. దీంతో ఆ పేషెంట్‌ని హుటాహుటిన ఇండోర్ నుంచి ముంబైకి ఎయిర్ అంబులెన్సులో తరలించారు.
సైనస్, లంగ్స్, బ్లడ్ లో గ్రీన్ ఫంగస్ అభివృద్ధి చెందినట్టు బయటపడిందని వైద్యులు చెప్పారు. ఇండోర్‌లోని శ్రీ అరబిందో ఇస్స్టిట్యూట్ ఆఫ్ మెడికల్ సైన్సెస్ ఆసుపత్రి డాక్టర్లు ఈ కేసుకు చికిత్స అందిస్తున్నారు. పేషెంట్‌ను ఎయిర్ అంబులెన్స్ ద్వారా ముంబైలోని హిందుజా ఆస్పత్రికి తరలించారు.
గ్రీన్ ఫంగస్ పేషెంట్ ఇటీవలే కరోనా నుంచి కోలుకున్నాడని.. అయితే, ఆ తర్వాత ముక్కు నుంచి రక్తం కారడం, జ్వరం వంటి వాటితో బాధపడ్డారని డాక్టర్ రవి తెలిపారు. అంతేకాదు.. ఆయన బరువు తగ్గి, చాలా బలహీనంగా మారారని చెప్పారు. గ్రీన్ ఫంగస్‌పై రీసెర్చ్ జరగాల్సి ఉందని... కరోనా నుంచి కోలుకున్న వారిపై ఈ ఫంగస్ ఎలాంటి ప్రభావం చూపుతుందనే విషయాన్ని తెలుసుకోవాల్సిన అవసరం ఉందన్నారు.
