ఉద్యోగుల ప్రావిడెంట్ ఫండ్ ఆర్గనైజేషన్ (EPFO) తన 7.5 కోట్ల మంది సభ్యులకు 'జీవన సౌలభ్యాన్ని' ప్రోత్సహించడానికి ఆటో సెటిల్‌మెంట్ అడ్వాన్స్ క్లెయిమ్ (ASAC) పరిమితిని రూ.1 లక్ష నుండి రూ.5 లక్షలకు పెంచాలని నిర్ణయించింది. గత వారం జరిగిన సెంట్రల్ బోర్డ్ ఆఫ్ ట్రస్టీస్ (సీబీటీ) ఎగ్జిక్యూటివ్ కమిటీ 113వ సమావేశంలో కార్మిక- ఉపాధి మంత్రిత్వ శాఖ కార్యదర్శి సుమితా దావ్రా ఈ ప్రతిపాదనను ఆమోదించారు.
ప్రస్తుతం ఈ సిఫార్సును తుది ఆమోదం కోసం సీబీటీకి పంపుతారు. మార్చి 28న జమ్మూ కాశ్మీర్‌లోని శ్రీనగర్‌లో జరిగిన ఈ సమావేశంలో ఈపీఎఫ్వో సెంట్రల్ ప్రావిడెంట్ ఫండ్ కమిషనర్ రమేష్ కృష్ణమూర్తి కూడా పాల్గొన్నారు. ఆటో సెటిల్‌మెంట్ అడ్వాన్స్ క్లెయిమ్ ఆమోదం పొందిన తర్వాత, ఈపీఎఫ్వో సభ్యులు ఆటో మోడ్ ద్వారా రూ.5లక్షల వరకు పీఎఫ్‌ని ఉపసంహరించుకోగలరు.
అనారోగ్య చికిత్స కోసం ఏప్రిల్ 2020లో మొదటిసారిగా ఆటో మోడ్ క్లెయిమ్ సెటిల్‌మెంట్ ప్రవేశపెట్టబడింది. మే 2024లో, ఈ పరిమితిని రూ.50,000 నుండి రూ.1 లక్షకు పెంచారు. ఇప్పుడు ఈ పరిమితిని ఐదు రెట్లు పెంచుతున్నారు. ఇది సభ్యులకు గొప్ప ప్రయోజనాన్ని ఇస్తుంది.
ఈపీఎఫ్వో ఇప్పుడు విద్య, వివాహం, గృహనిర్మాణం అనే మరో మూడు వర్గాలకు ఆటో మోడ్ పరిష్కారాన్ని అమలు చేసింది. గతంలో, సభ్యులు అనారోగ్యం/ఆసుపత్రిలో చేరినప్పుడు మాత్రమే పీఎఫ్ ఉపసంహరణ చేసుకునేవారు. ఈ కొత్త వ్యవస్థ కింద, క్లెయిమ్‌లు లేదా చెల్లింపులు కేవలం 5 రోజుల్లోనే ప్రాసెస్ చేయబడతాయి, 50శాతం క్లెయిమ్‌ల చెల్లింపులు స్వయంచాలకంగా పరిష్కరించబడతాయి.
2024-25 ఆర్థిక సంవత్సరంలో, ఈపీఎఫ్వో ఇప్పటివరకు 2.16 కోట్ల ఆటో-క్లెయిమ్‌లను పరిష్కరించింది. ఇది 2023-24లో 89.52 లక్షలతో పోలిస్తే చారిత్రాత్మకంగా ఎక్కువ. దీనితో పాటు, క్లెయిమ్ తిరస్కరణ రేటు 50శాతం నుండి 30శాతంకి తగ్గించబడింది. ఈపీఎఫ్వో ఐటీ వ్యవస్థ ద్వారా ఆటో-క్లెయిమ్ పరిష్కారాన్ని అమలు చేసింది. ఈ ప్రక్రియను ఎటువంటి మానవ జోక్యం లేకుండా పూర్తిగా డిజిటల్ చేసింది.
అలాగే ప్రస్తుతం యూపీఐ, ఏటీఎంల ద్వారా పీఎఫ్ విత్ డ్రా చేసుకునే సౌకర్యం అందుబాటులో రానుంది. ఈపీఎఫ్ఓ త్వరలో ఈ కొత్త విప్లవాత్మక వ్యవస్థను ప్రారంభించబోతోంది. దీని కింద సభ్యులు యూపీఐ (యూనిఫైడ్ పేమెంట్స్ ఇంటర్‌ఫేస్), ఏటీఎం ద్వారా తమ పీఎఫ్ నిధులను ఉపసంహరించుకోగలరు. ఎన్పీసీఐ ప్రతిపాదనను కార్మిక మరియు ఉపాధి మంత్రిత్వ శాఖ ఆమోదించింది.
ఈ సౌకర్యం ఈ సంవత్సరం మే లేదా జూన్ నాటికి ప్రారంభమయ్యే అవకాశం ఉంది. ఈ వ్యవస్థను భవిష్యత్తులో ప్రభుత్వ ఉద్యోగుల జనరల్ ప్రావిడెంట్ ఫండ్ (GPF), బ్యాంకుల పబ్లిక్ ప్రావిడెంట్ ఫండ్ (PPF) వంటి ఇతర పథకాలకు కూడా అమలు చేయవచ్చు.
