బెల్లం ఆరోగ్యానికి ఎంత మేలు చేస్తుందో.. అందానికి కూడా అంతే మేలు చేస్తుందని బ్యూటీ నిపుణులు చెబుతున్నారు. బెల్లంలోని మినరల్స్, న్యూట్రియన్స్ వంటి ఖనిజాలు చర్మ సంరక్షణకు చాలా ఉపయోగపడుతాయి. బయట దొరికే ఫేస్‌ప్యాక్స్, క్రీమ్స్ కంటే బెల్లం అందానికి మంచి ఔషధంగా పనిచేస్తుంది. మరి దీనితో ప్యాక్ ఎలా వేసుకోవాలో చూద్దాం..
బెల్లం ఫేస్‌ప్యాక్:
బెల్లాన్ని మెత్తని పేస్ట్‌లా తయారుచేసుకుని అందులో కొద్దిగా నిమ్మరసం, కొబ్బరినూనె కలిపి ముఖానికి, మెడకు రాసుకోవాలి. అరగంట పాటు అలానే ఉంచాలి. ఆపై 5 నిమిషాలు ముఖాన్ని మర్దన చేసుకోవాలి. తరువాత చల్లని నీటితో శుభ్రం చేసుకుంటే.. ముఖం తాజాగా, కాంతివంతంగా మారుతుంది.
పావుకప్పు బెల్లంలో కొద్దిగా పెరుగు, ముల్తానీ మట్టి కలిపి జుట్టుకు రాసుకోవాలి. రెండు గంటల తరువాత తలస్నానం చేయాలి. ఇలా వారానికి రెండుసార్లు చేస్తే జుట్టు చివర్ల చిల్లకుండా ఉంటుంది. అంతేకాదు.. వెంట్రుకలు ఒత్తుగా పెరుగుతాయి. అలానే బెల్లాన్ని మాత్రం మెత్తగా దంచి అందులో కొద్దిగా నీరు కలిపి పేస్ట్‌ చేసి మెుటిమలున్న ప్రాంతాల్లో రాసుకుంటే.. మెుటిమ సమస్యపోతుంది.
బెల్లాన్ని పాకంలా చేసుకుని అందులో కొద్దిగా చక్కెర, కీరదోస రసం, పాలు కలిపి ముఖానికి ప్యాక్ వేసుకోవాలి. గంట తరువాత గోరువెచ్చని నీటితో శుభ్రంగా కడుక్కోవాలి. ఆ తరువాత మెత్తని టవల్‌తో తుడుచుకోవాలి. ఇలా వారానికి మూడుసార్లు క్రమంగా చేస్తే కంటి కిందటి నల్లటి వలయాలు తొలగిపోయి... ముఖం కోమలంగా తయారవుతుంది.
