అమ్మాయి.. అబ్బాయి ప్రేమించుకోవడంలో తప్పు లేదు. ఇంకా అందులో అర్థం వుంది. కానీ అమ్మాయి.. మరో అమ్మాయి ప్రేమించుకుంటే..? అదే జరిగింది. ఇది ఇద్దరమ్మాయిల ప్రేమ కథ. అంతేగాకుండా వీరిద్దరూ ఇంటి నుంచి పారిపోయారు. ఈ వ్యవహారం ఏపీలో చోటుచేసుకుంది. వివరాల్లోకి వెళితే.. ఆంధ్రప్రదేశ్‌లోని కర్నూలు జిల్లాలో బుధవారం వెలుగులోకి వచ్చింది. ఇద్దరు యువతుల ప్రేమాయణం కర్నూలుతో పాటు యావత్ తెలుగు రాష్ట్రాలను అయోమయానికి గురిచేస్తోంది.
కర్నూలు లోని సంతోష్ నగర్‌కు చెందిన యువతి (21), నర్సింహ రెడ్డి నగర్‌కు చెందిన మరో యువతి (20) ఇంట్లో నుండి పరారయ్యారు. వీరిరువురు పెద్దవాళ్లు తమ ప్రేమను ఒప్పుకోనందుకు ఇంటి నుంచి వెళ్లిపోయారు.ఆ ఇద్దరు యువతులు చిన్ననాటి నుంచి స్నేహితులు. ఇంటర్మీడియట్ వరకు కలిసి చదువుకున్నారు.
ఇంతలో నర్సింహరెడ్డి యవతిని ఇంట్లో వాళ్లు చదువు మాన్పించారు. ఇటీవలే ఆమెకు పెళ్లి సంబంధాలు కూడా చూస్తున్నారని తెలిసింది. అది ఆ యువతికి నచ్చలేదు. చిన్ననాటి నుంచి కలిసి తిరిగిన తన మిత్రురాలితోనే జీవితం గడపాలనుకుంది. చిన్నప్పటి నుంచే స్నేహం ఉన్న వారి మధ్య.. అది కాస్తా ప్రేమ బంధంగా మారింది. దీంతో ఇద్దరు కలిసి బుధవారం ఇరువురి తల్లిదండ్రులకు మెసేజ్ పెట్టి ఇంటి నుంచి వెళ్లిపోయారు.
దీంతో ఇరువురి తల్లిదండ్రులు పోలీసులకు ఫిర్యాదు చేశారు. కేసు నమోదు చేసుకున్న రెండో పట్టణ పోలీసులు.. దర్యాప్తు చేపట్టారు. ఆ యువతుల కోసం పోలీసులు గాలింపు చర్యలు చేపట్టారు.
